കന്യാകുമാരിയിലെ പുരാതന ക്ഷേത്രങ്ങളും സ്മാരകങ്ങളും

1892 ഡിസംബറിലാണ് വിവേകാനന്ദസ്വാമികൾ കടൽ നീന്തിക്കടന്ന് പാറയിൽ ധ്യാനിക്കുന്നതിനായി കന്യാകുമാരിയിൽ എത്തുന്നത്. പാറയിൽ ധ്യാനിക്കുന്നതിന് മുൻപ് കന്യാകുമാരി ദേവീ ക്ഷേത്രത്തിൽ ദർശനം നടത്തുകയും ദേവീകടാക്ഷത്താൽ അമാനുഷിക ശക്തി ആർജ്ജിച്ചതിനാലാവാം കടൽക്ഷോഭത്തെ വക വെക്കാതെ അത്ര ദൂരം താണ്ടി പാറയിൽ എത്തിച്ചേർന്നതെന്നുമാണ് വിശ്വാസം.

- ഡോ. പി. കെ. ജയകുമാരി

കന്യാകുമാരിയിലെ രണ്ട് പാറകളിൽ ഒന്നായ വിവേകാനന്ദപ്പാറ കാണാൻ പോയ യാത്ര ഓർക്കുമ്പോൾ മനസ്സിലേക്ക് ഓടിയെത്തുന്നത് ഇരമ്പിയെത്തുന്ന തിരമാലകളാണ്. ഒന്നിന് പുറകേ ഒന്നായി പാൽപ്പത തിരമാലകൾ വരുന്നത് കണ്ടപ്പോൾ, നെയ്തെടുത്ത വെള്ള കമ്പിളി പുതപ്പുകൾ തെറുത്ത് തെറുത്ത് വെക്കുന്നതു പോലെ തോന്നി. ഓരോരോ തിരമാലകളും കടൽ ഭിത്തിയിൽ വന്ന് ഇടിച്ചിട്ട് കുറച്ച് കൂടെ ശക്തിയാർജ്ജിച്ച് വരാം അപ്പോൾ നിന്നെ കണ്ടോളാമെന്ന ഭാവമായിരുന്നു. അവർ തോറ്റ് മടങ്ങി പോവുന്ന കാഴ്ച്ച കുട്ടികളായ ഞങ്ങൾ കൊതി തീരെ ആസ്വദിച്ചു.

കടലിൽ തിരമാലകളൊക്കെ കടന്ന് കുറെ ദൂരെയായി വിവേകാനന്ദപ്പാറ കണ്ടതും വിവേകാ നന്ദസ്വാമികളെക്കുറിച്ചും വിവേകാന്ദപ്പാറയെക്കുറിച്ചും അച്ഛനും അമ്മയും വിവരിച്ചു തന്നത് ഇന്നും ഓർമ്മയിൽ മായാതെ നിൽക്കുന്നു.

1892 ഡിസംബറിലാണ് വിവേകാനന്ദസ്വാമികൾ കടൽ നീന്തിക്കടന്ന് പാറയിൽ ധ്യാനി ക്കുന്നതിനായി കന്യാകുമാരിയിൽ എത്തുന്നത്. പാറയിൽ ധ്യാനിക്കുന്നതിന് മുൻപ് കന്യാകുമാരി ദേവീ ക്ഷേത്രത്തിൽ ദർശനം നടത്തുകയും ദേവീകടാക്ഷത്താൽ അമാനുഷികശക്തി ആർജ്ജിച്ചതിനാലാവാം കടൽക്ഷോഭത്തെ വക വെക്കാതെ അത്ര ദൂരം താണ്ടി പാറയിൽ എത്തിച്ചേർന്നതെന്നുമാണ് വിശ്വാസം. ഞങ്ങളുടെ ആദ്യ സന്ദർശനവേളയിൽ വിവേകാനന്ദ സ്മാരകം നിർമ്മിച്ചിട്ടില്ലായിരുന്നു. 1970 സെപ്തംബർ 2നാണ് നിർമ്മാണം പൂർത്തീകരിച്ച് സ്മാരകം രാഷ്ട്രത്തിന് സമർപ്പിച്ചത്. സ്വാമികൾ കടലിൽ കുറെ അകലത്തിലായി കാണുന്ന പാറയിൽ, ആഞ്ഞടിക്കുന്ന ഭീകരമായ തിരമാലകൾക്കിടയിലൂടെ നീന്തി കടന്ന് കയറിപ്പറ്റിയെന്നത് അതിശയമായിരുന്നു. കടലിനെ എതിരിട്ട മനക്കരുത്താണ് , 1893 ൽ ചിക്കാഗോയിൽ വെച്ച് നടന്ന സർവ്വമതസമ്മേളനത്തിൽ പങ്കെടുക്കാനും ഭാരതീയ സംസ്ക്കാരത്തെക്കുറിച്ച് ലോകത്തിന് പരിചയപ്പെടുത്തുവാനും സ്വാമികൾക്ക്  സാധിച്ചതും ചരിത്രസംഭവമായതും.