மிருதங்கத்தில் கலக்கும் ஹைபர் ஆக்டிவ் மாற்றுத்திறனாளி இளைஞர்!

சிறப்புக் குழந்தைகள் என்றாலே துறுதுறுவென ஆர்ப்பாட்டம் செய்துகொண்டும், கூச்சலிட்டபடியும் இருப்பார்கள் என்ற நினைப்பே நம்மில் பலருக்கும் இருக்கும்.

ஆனால், சிறப்புக் குழந்தைகளோ இன்று பலவற்றில் சாதிக்கும் குழந்தைகளாக மாறிவருகின்றனர். 

நீச்சல், இசை, விளையாட்டு எனத் தங்களுக்குப் பிடித்தமான விஷயங்களில் கவனம் செலுத்தி, அதில் சாதித்து எல்லோரையும் ஆச்சரியப்படுத்துகின்றனர். அந்த வகையில் மிருதங்கம் மற்றும் டோலக் தாளக் கருவிகளை வாசித்து கலக்குகிறார் சென்னையைச் சேர்ந்த சிறப்பு மற்றும் மாற்றுத்திறனாளி இளைஞரான ஸ்ரீவெங்கடேஷ்.

சமீபத்தில் அன்னையர் தினத்தன்று கவர்னர் மாளிகையில் நடந்த இசை நிகழ்ச்சியில் மிருதங்கம் வாசித்து பாராட்டையும் பரிசையும் பெற்றுள்ளார். இடது கண்ணில் சிறிதளவு மட்டுமே பார்வை கொண்ட ஹைபர்ஆக்டிவ் இளைஞரான ஸ்ரீவெங்கடேஷின் இந்த அசாத்திய திறமை வியக்க வைக்கிறது.  

 ‘‘ராஜ்பவன்ல இசை நிகழ்ச்சி செஞ்சது சிறப்பாக இருந்தது. கவர்னர் எங்களப் பாராட்டினார். என்கூட அண்ணன்கள் நிறைய பேர் சேர்ந்து வாசிச்சாங்க. நான் மிருதங்கமும், டோலக்கும் வாசிச்சேன்...’’ என உற்சாகமாகச் சொல்லும் ஸ்ரீவெங்கடேஷின் தலையைக் கோதியபடி, பேச ஆரம்பித்தார் அவரின் தாய் தமிழ்ச்செல்வி.

‘‘எங்களுக்கு ரெண்டு பசங்க. மூத்தவன் ஸ்ரீவெங்கடேஷ். சின்னவன் குமரன். என் கணவர் மணி, திருப்பூர் பனியன் கம்பெனியில் வேலை செய்றார். அதனால், இப்ப அங்க வசிக்கிறோம். இவனுக்கு நிகழ்ச்சி இருந்தால் நான் அழைச்சிட்டு வருவேன். இல்லனா அவ்வப்போது சென்னையில் அம்மா வீட்டுக்குக் கூட்டிட்டு வருவேன்.  ஸ்ரீவெங்கடேஷ் பிறந்ததுமே உடல்ல பிரச்னைகள் இருந்தது. 

அப்புறம், கண்கள்ல வெள்ளையாக இருக்குனு சொன்னாங்க. அதனால், எழும்பூர் குழந்தைகள் நல மருத்துவமனைக்கு அழைச்சிட்டு போனோம். எட்டு மாசத்துல புரை வளர்ந்திருக்குனு ஆபரேஷன் செய்தாங்க. அதன்பின்பும் கருவிழி எதுவும் தெரியல. அதனால், இன்னும் சில ஆபரேஷன்கள் செய்தாங்க.

பிறகு கோவையிலுள்ள தனியார் கண் மருத்துவமனையில் பரிசோதிச்சோம். அடுத்ததாக, சென்னை தனியார் கண் மருத்துவமனையில் மாற்று அறுவை சிகிச்சை செய்தோம். ஆனால், அது ஃபெயிலியர் ஆகிடுச்சு. மூணு மாசத்துல கண்ல சீழ் பிடிச்சிடுச்சு. அதனால், நரம்புகளை அகற்றினாங்க. பிறகு, வலது கண்ல பார்வை சுத்தமாக போயிடுச்சு.