60 வயது வைரல் அழகி!

அசாமில் சமீபத்தில் நடந்த ஒரு திருமணத்தின் புகைப்படங்களும் வீடியோக்களும் இணையத்தில் வைரலாகிக் கொண்டிருக்கின்றன. அனைவரும் யார் இந்தப் பெண்... இவ்வளவு அழகாக இருக்கிறே... எனத் தேடினர்.

அவர் மணப்பெண்ணோ அல்லது மணப்பெண்ணின் தோழியோ இல்லை. மணமகனின் தாய்!

ஆம். கிட்டத்தட்ட 60 வயதை நெருங்குகிறார் அருணிமா தத்தா.

இந்த அருணிமா தத்தா, தனது 25 வயது மகனுக்கு சமீபத்தில் திருமணம் செய்த புகைப்படங்கள்தான் தற்போது வைரலாகி வருகின்றன.

பார்ப்பதற்கு கல்லூரி மாணவி அல்லது மணப்பெண்ணின் தோழி போல திருமணம் முழுக்க இவரது புகைப்படங்கள் வைரலாகிக் கொண்டிருக்கின்றன. சாதாரணமாக சுற்றிக்கொண்டிருந்த இந்த புகைப்படங்கள் அவரின் வயது இதுதான் எனத் தெரிந்ததும் ஹாட் வைரலாகி விட்டன.

யார் இந்த அருணிமா தத்தா?

'அனைவரையும் நேசி... அனைவருக்கும் சேவை செய்...' என்பதே தனது தாரக மந்திரம் என்கிறார் அருணிமா தத்தா.

"ஆம். இதைத்தான் எனது வாழ்க்கையின் அடிப்படையாகக் கொண்டு வாழ்கிறேன். சிறுவயது முதல் யோகா, உடற்பயிற்சி... இத்துடன் குடும்பத்தின் பாரம்பரிய பழக்கமான ஆரோக்கிய உணவு முறைகளை மட்டும்தான் உட்கொள்ள வேண்டும் என்கிற கட்டுப்பாடு... இவை அனைத்தும் இணைந்து என்னையும் என் குடும்பத்தையும் ஆரோக்கியமாக வைத்திருக்கிறது..." எனத் தொலைபேசியில் தொடர்பு கொண்டபோது சிரித்தபடி சொன்ன அருணிமா, 2015ம் ஆண்டு தனது யோகா மையத்தைத் துவக்கியிருக்கிறார்.