ഇന്നലെകളും നാളെയുമില്ലാത്ത സിനിമയിൽ ഷങ്കർ

ഷങ്കറിന്റെ റാം ചരൺ ചിത്രമായ ഗെയിം ചേഞ്ചർ ഡിസംബർ 25 ന് റിലീസ് ചെയ്യുമെന്ന് നിർമ്മാതാവ് ദിൽ രാജു അറിയിച്ചിട്ടുണ്ട്. വലിയ പ്രതീക്ഷയാണ് ചിത്രം നൽകുന്നത്. ഷങ്കറിന്റെ ശക്തമായ ഉയിർത്തെഴുന്നേൽപ് ആവട്ടെ ഈ ചിത്രം എന്ന് നമുക്ക് പ്രത്യാശിക്കാം, ആശംസിക്കാം.

- -നാനാജി

ഇൻഡ്യൻ 2' സിനിമയുടെ പ്രദർശനം പിന്നിട്ട് നാളുകൾക്കുശേഷമാണ് ഈ കുറിപ്പ് എഴുതുന്നത്.ഒരുപക്ഷേ ഇത്രയേറെ വിമർശനങ്ങൾക്ക് വിധേയമായ ഒരു സിനിമ അടുത്ത കാലത്തൊന്നും ഉണ്ടായിട്ടില്ല എന്നുവേണം പറയാൻ. കമലഹാസൻ-ഷങ്കർ ഒന്നിച്ച ഇൻഡ്യൻ തുടങ്ങിയിട്ട് വർഷങ്ങൾ ഏറെയായി. 'വിക്രം' എന്ന സിനിമയോടെ തന്റെ മൂല്യം ഉയർത്തിയ കമലഹാസൻ, ഇൻഡ്യൻ സിനിമയിലെ തന്നെ മെഗാഫിലിംമേക്കർ ഷങ്കർ. യുവ സംഗീത പ്രേമികളുടെ ഹരമായ സംഗീത സംവിധായകൻ അനിരുദ്ധ് തുടങ്ങി വമ്പൻ ടീം ഒന്നിച്ച സിനിമയുടെ നിർമ്മാതാക്കളാകട്ടെ തമിഴിലെ ഇന്നത്തെ ഏറ്റവും വലിയ നിർമ്മാണ സ്ഥാപനമായ ലൈക്കാ പ്രൊഡക്ഷൻസും. അതുകൊണ്ടുതന്നെ പ്രേക്ഷക പ്രതീക്ഷ ഏറിയില്ലെങ്കിലേ അത്ഭുതപ്പെടാനുള്ളൂ. കോടികൾ വാരിവിതറി നിർമ്മിച്ച "ഇൻഡ്യൻ 2 നെക്കുറിച്ചുള്ള വാർത്തകൾ സിനിമ തുടങ്ങിയ ദിവസം മുതൽ മാധ്യമങ്ങൾ കൊണ്ടാടുകയായിരുന്നു. എന്നാൽ സിനിമ പുറത്തിറങ്ങിയപ്പോൾ പ്രേക്ഷകർ ഒന്നടങ്കം പറഞ്ഞു- "ഷങ്കർ തങ്ങൾക്ക് ഹൽവ തന്നു എന്ന് തമിഴിൽ ഹൽവ കൊടുക്കുക എന്നാൽ കബളിപ്പിക്കുക എന്ന് പൊരുൾ.

1996 ലാണ് ഷങ്കറിന്റെ കമൽ ചിത്രമായ "ഇൻഡ്യൻ' റിലീസ് ചെയ്തത്. അതുവരെയുള്ള ഷങ്കർ സിനിമകളിൽ നിന്നും വ്യത്യസ്തമായി ഭരണകൂടത്തിന്റേയും, ബ്യൂറോക്രസിയുടേയും കൊള്ളരുതായ്മകൾക്കും അഴിമതിക്കും നേരെയുള്ള ശക്തമായ താക്കീതും വിമർശനവുമായി രുന്നു ചിത്രത്തിന്റെ ഉള്ളടക്കം. കമലഹാസന്റെ സേനാപതി എന്ന താത്ത(അപ്പൂപ്പൻ) കഥാപാത്രവും 'ഇന്ത്യൻ' എന്ന ചിത്രവും കാൽനൂറ്റാ ണ്ടിലേറെക്കാലമായി സിനിമാസ്വാദകരുടെ ഹൃദയത്തിൽ ചിരഞ്ജീവിയായി ജീവിച്ചു കൊണ്ടിരിക്കവേയാണ് ചിത്രത്തിന്റെ രണ്ടാം ഭാഗത്തിന്റെ വരവ്.