പകൽസ്വപ്നത്തിൽനിന്ന് പഴവർഗക്കൃഷിയിലേക്ക്

കൃഷിയിൽ തുടങ്ങി മൂല്യവർധനയിലേക്കും നേരിട്ടുള്ള വിപണന സംവിധാനങ്ങളിലേക്കും വളർച്ച

ദീർഘകാലം ഗൾഫിൽ കഴിഞ്ഞിട്ടും ബ്ലെയ്സിയുടെ മനസ്സിലെ കൃഷിപ്പച്ചപ്പിനു തെളിച്ചം കൂടുകയല്ലാതെ തെല്ലും മങ്ങലുണ്ടായില്ല. മക്കൾ പഠനവും വിവാഹവുമായി മുതിർന്നപ്പോൾ സമയം കുറേക്കൂടി ബാക്കിയായി. കൃഷിയെക്കുറിച്ചുള്ള പകൽസ്വപ്നങ്ങളുടെ ദൈർഘ്യം കൂടി. ഭാര്യയുടെ കൃഷിതാൽപര്യങ്ങളെ ഭർത്താവ് ജോർജ്ജോസഫും തുണച്ചതോടെ  സ്വപ്നം ഏക്കറുകൾ വരുന്ന പഴ വർഗ കൃഷിയിടമായി ഫലിച്ചു. 14 വർഷം മുൻപ് ചവറയിലെ പുരയിടത്തിൽ കൃഷി തുടങ്ങിയ ബ്ലെയ്സി ഇന്ന് സംസ്ഥാനത്തെ തന്നെ മുൻനിരക്കൃഷിക്കാരിൽ ഒരാൾ.

അഷ്ടമുടിക്കായലിന്റെ തീരത്തെ നാലേക്കർ പുരയിടം നിറയെ വിളഞ്ഞു കിടക്കുന്ന ഒട്ടേറെയിനം പഴവർഗവിളകൾ, പാലക്കാട് കൊഴിഞ്ഞാമ്പാറയിൽ ഇരുപതേക്കറോളം വരുന്ന തെങ്ങിൻതോപ്പിൽ ഇടവിളയായും തനി വിളയായും വളർന്ന് വരുമാനത്തിലെത്തിയ മാവിനങ്ങൾ, സ്വന്തം ഉൽപന്നങ്ങൾ ഉപഭോക്താക്കൾക്കു നേരിട്ടു വിൽക്കാൻ ചവറയിൽ മനോഹരമായ ഔട്ട്ലെറ്റ് ; ഇവയൊന്നും ഒരു സുപ്രഭാതത്തിൽ ഒന്നിച്ചു മുതലിറക്കി സൃഷ്ടിച്ചതല്ല, തെറ്റിയും തിരുത്തിയും ഒന്നിനെ പത്താക്കിയും ഈ വനിത നടത്തിയ അധ്വാനത്തിന്റെയും ആസൂത്രണങ്ങളുടെയും സദ്ഫലമാണ്. അങ്ങനെ കൈവന്ന വരുമാന സുസ്ഥിരതയാണ് ഈ കൃഷിയിടത്തിന്റെ മേന്മയും.

മാവുകൃഷി, മാംഗോ ടൂറിസം