നിങ്ങൾ ഒരു ടോക്സിക് പാരന്റാണോ?

'കാക്കക്കും തൻകുഞ്ഞു പൊൻകുഞ്ഞ് എന്നാണ് പഴമൊഴിയെങ്കിലും മാനസികവും ശാരീരികവുമായി കുട്ടികളെ പീഡിപ്പിക്കുന്ന, അവരുടെ വ്യക്തിത്വ വളർച്ചക്ക് അറിഞ്ഞോ അറിയാതെയോ തടയിടുന്ന അച്ഛനമ്മമാർ ഏറെയുണ്ട് നമുക്കു ചുറ്റും. നിങ്ങളിലുണ്ടോ അത്തരം ടോക്സിക് പാരൻറിങ് ശൈലികൾ...

ആരോഗ്യകരവും സന്തോഷം നിറഞ്ഞതുമായ കുട്ടിക്കാലം എല്ലാ കുഞ്ഞുങ്ങളുടെയും അവകാശമാണ്. എന്നാൽ, അതെല്ലാ കുട്ടികൾ ക്കും പ്രാപ്യമാകുന്നില്ല എന്നത് നിർഭാഗ്യകരമായ വസ്തുതയാണ്. കുഞ്ഞുങ്ങളെ സംരക്ഷിക്കുന്നതും വളർത്തി വലുതാക്കുന്നതും എല്ലാ ജീവജാലങ്ങളുടെയും ജീവിതത്തിലെ ശ്രമകരമായ ഒരധ്യായമാണ്.

കുട്ടിയുടെ വ്യക്തിത്വത്തിന്റെ പ്രത്യേകതകളും കഴിവുകളും കഴിവില്ലായ്മകളും നിരീക്ഷിച്ചു മനസ്സിലാക്കുകയും ക്രിയാത്മകമായ ഇടപെടലു വഴി കുഞ്ഞിൽ ആത്മവിശ്വാസവും മറ്റുള്ളവരെ സ്നേഹിക്കാനും വിശ്വസിക്കാനുമുള്ള ശേഷിയും സന്തോഷവും നിറക്കുകയും സമാധാനപരവും സുരക്ഷിതവുമായ ജീവിതാന്തരീക്ഷം സൃഷ്ടിക്കുകയും ചെയ്യേണ്ടത് അച്ഛനമ്മമാരുടെ ഉത്തരവാദിത്തമാണ്. എന്നാൽ, കുഞ്ഞുങ്ങളെ വളർത്തുന്നതിന് ഒരുവിധ പരിശീലനവും ലഭിക്കാതെയാണ് ഒട്ടുമിക്ക മനുഷ്യരും രക്ഷാകർതൃത്വം എന്ന ഉത്തരവാദിത്തം ഏറ്റെടുക്കാറുള്ളത്.

പാരന്റിങ് വിദഗ്ധരുടെ ക്ലാസുകളും പരിശീലനങ്ങളുമെല്ലാം നല്ലതോതിൽ തന്നെ പട്ടണങ്ങളിൽ നടക്കാറുണ്ടങ്കിലും അവയെല്ലാം അച്ഛനമ്മമാർക്ക് കുഞ്ഞുങ്ങളെ വളർത്തുന്നതിനെക്കുറിച്ചുള്ള പൊതുവായ ചില കാര്യങ്ങൾ മനസ്സിലാക്കിക്കൊടുക്കുന്നതിൽ മാത്രമായി ഒതുങ്ങി നിൽക്കുന്നു. യഥാർഥജീവിതത്തിൽ വ്യത്യസ്ത സാഹചര്യങ്ങളിൽ ഓരോ കുട്ടിയോടും പ്രായോഗികമായി ഇടപെടേണ്ടതെങ്ങനെയെന്ന് അച്ഛനമ്മമാരെ പഠിപ്പിക്കുക എന്നത് അസാധ്യമാണ് എന്നു തന്നെ പറയേണ്ടി വരും. അതുകൊണ്ടുതന്നെ അനുഭവത്തിൽ നിന്നും മുതിർന്നവരും പരിചയക്കാരും നൽകുന്ന നിർദേശങ്ങളിൽ നിന്നുമുള്ള ഒരു 'trial and error' മാതൃകയാണ് അധികമാളുകളും പിന്തുടരാറുള്ളത്.

നിറം മാറുന്നവർ