അങ്ങാടിയിലെ ആശക്കൂടാരം

സൂര്യചന്ദ്രന്മാർ നിഴൽച്ചിത്രങ്ങൾ വരയ്ക്കുന്ന, കാറ്റും വെളിച്ചവും പച്ചപ്പും നിറയുന്ന ഈ വീട് വെറും മൂന്നര സെന്റിലാണ്

കുന്നംകുളം തെക്കേ അങ്ങാടിയിലെ മൂന്നര സെന്റിലുള്ള വീട് അതിന്റെ പേര് പോലെത്തന്നെ ഒരു "ആശക്കൂടാര'മാണ്. സ്ഥലത്തിന്റെ വലുപ്പമല്ല, ഡിസൈൻ ചിന്തകളുടെ ആകെത്തുകയാണ് വീടിന്റെ ഭംഗി എന്നതിന് തെളിവായ വീട്. ആർക്കിടെക്ട് ദമ്പതികളായ ബിജേഷിന്റെയും പൂജയുടെയും ഭാവനകൾ ചെറിയ സ്ഥലമുള്ള ഏവർക്കും ആശകളും ആവേശവും കൊടുക്കുന്നതാണ്.

തിങ്ങിനിൽക്കുന്ന, വെളിച്ചം കടക്കാത്ത, റോഡിലേക്കു തുറക്കുന്ന അങ്ങാടിവീടുകൾ ഇവിടെ പലർക്കും ബാധ്യതയാണ്. പലരും പുതിയ സ്ഥലമന്വേഷിച്ചു പോകുമ്പോളാണ് ഗീഗോയും ആശയും തങ്ങളുടെ മൂന്നര സെന്റിന്റെ വെല്ലുവിളി ഏറ്റെടുത്തത്.

ആനേം കാണാം, പെരുന്നാളും കാണാം

സ്ഥലപരിമിതി ഏശാത്ത വിധത്തിലാണ് വീടിന്റെ ഡിസൈൻ. മുൻവശത്ത് പരമാവധി സ്ഥലം വിട്ടിരിക്കുന്നതിനാൽ രണ്ട് കാർ പാർക്ക് ചെയ്യാം. വളഞ്ഞുനിൽക്കുന്ന മുൻവശത്തെ ഭിത്തി അനാവശ്യ സ്ഥലം കളയുന്നില്ല, മാത്രമല്ല, വീടിന് ഒരു തുടർച്ചയും വേറിട്ട ഭംഗിയും കൊടുക്കുന്നു.