ചെറുകിട നിക്ഷേപകരുടെ ആത്മവിശ്വാസത്തിൽ വിപണി കുതിക്കും

കുതിപ്പിൽ നിഫ്റ്റിക്ക് 20,267 ലും 20,685 ലും പ്രതിരോധവും തിരുത്തലിൽ 19,255ലും 18,661 ലും പിന്തുണയും പ്രതീക്ഷിക്കാം.

പുതിയ സംവത് 2080 നിക്ഷേപകർക്ക് വലിയ നേട്ടം നൽകിയേക്കും. സംവത് 2079ൽ നിഫ്റ്റി 9 ശതമാനത്തിൽ കൂടുതൽ ഉയർന്നിരുന്നു. ഇത്തവണ അതിലും മികച്ച നേട്ടം പ്രതീക്ഷിക്കാം. നിക്ഷേപകരുടെ ഈ ആത്മവിശ്വാസത്തെ പ്രതിഫലിപ്പിക്കുന്നതായിരുന്നു ദീപാവലി മുഹൂർത്ത വ്യാപാരം. നിഫ്റ്റി 100 പോയിന്റ് നേട്ടത്തിൽ ക്ലോസ് ചെയ്തത് അതിന്റെ സൂചനയാണ്. ആഭ്യന്തര നിക്ഷേപകർക്ക് ഇന്ത്യൻ വിപണിയിലുള്ള വിശ്വാസം വലിയതോതിൽ വർധിച്ചിട്ടുണ്ടെന്ന് കഴിഞ്ഞ സംവത് ശ്രദ്ധിച്ചാൽ മനസ്സിലാകും. സാധാരണ വിദേശ നിക്ഷേപകരുടെ വിൽപനയിൽ ആഭ്യന്തര നിക്ഷേപകർ പരിഭ്രാന്തരാകുകയാണു പതിവ്, എന്നാൽ, ഈ വർഷം അത്തരം സന്ദർഭങ്ങളിൽ ആഭ്യന്തര നിക്ഷേപകർ ഓഹരികൾ കൈവശം വച്ചു.

മ്യൂച്വൽ ഫണ്ടുകളിലേക്കു പണമൊഴുക്ക്

ഇക്വിറ്റി ഫണ്ടുകളിലേക്കു തുടർച്ചയായ 32-ാം മാസവും പണമൊഴുക്കു തുടരുകയാണ്. ഒക്ടോബറിൽ 42% കുതിച്ചുചാട്ടമാണ് നിക്ഷേപങ്ങളിലുണ്ടായത്. സ്‌മോൾ ക്യാപ് സ്കീമുകൾക്കാണു പ്രിയം കൂടുതൽ. ഓഹരി വിപണിയിലെ റെക്കോർഡ് റാലിയും ഇക്വിറ്റി സ്കീമുകളിലേക്കുള്ള നിക്ഷേപം വർധിക്കാൻ കാരണമായി.

ചെറുകിട നിക്ഷേപകർ ആവേശത്തിൽ