നല്ല ഭാവിക്കായി കോളജിൽനിന്നു തുടങ്ങാം ഈ പത്തു പാഠങ്ങൾ

കോളേജിൽ തന്നെ ജീവിതപാഠങ്ങളുടെ കൂടി ഹരിശ്രീ കുറിച്ചാൽ ഭാവിജീവിതത്തിനു ശക്തമായ അടിത്തറ ഉറപ്പാക്കാം, സാമ്പത്തികഭദ്രതയും നേടാം

ക്യാംപസിലെ മനോഹര ജീവിതത്തിലേക്ക് മണി മാനേജ്മെന്റ്, ചെലവു ചുരുക്കൽ, സമ്പാദ്യം തുടങ്ങിയ തലവേദനയുണ്ടാക്കുന്ന കാര്യങ്ങൾ എന്തിനാണ് വലിച്ചിഴയ്ക്കുന്നത്? ഇങ്ങനെ ചിന്തിക്കുന്നതേ തെറ്റാണ്. ഇന്നത്തെ ലോകത്ത് ഏറ്റവും വലിയ സമ്പത്ത് അറിവാണ്. "വിദ്യാധനം സർവധനാൽ പ്രധാനം' എന്നല്ലേ? അതായത് ലോകത്തെ ഏറ്റവും വലിയ സമ്പത്തു നേടാനുള്ള ഇടമാണ് കോളജുകൾ. അതുകൊണ്ടു ആ ക്യാംപസ് തീർച്ചയായും നിങ്ങളുടെ സുഭദ്രമായ ഒരു സാമ്പത്തികഭാവിയുടെ മികച്ച അടിത്തറ പണിയാനുള്ള ഇടം കൂടിയാക്കി മാറ്റണം.

കോളജ് ജീവിതം പഠിക്കാനും ആസ്വദിക്കാനും ഉള്ളതാണ്. അത് അങ്ങനെതന്നെ നടന്നോട്ടെ. ഒപ്പം അൽപം പ്ലാനിങ്ങിനായി കുറച്ചു സമയം നീക്കിവച്ചാൽ, ഈ അടിച്ചുപൊളിയും സന്തോഷവും ജീവിതകാലം മുഴുവൻ തുടരാം. അതിനായി മനസ്സിൽ വയ്ക്കേണ്ട ചില കാര്യങ്ങൾ ഇതാ

1. ആദ്യ നിക്ഷേപം കോഴ്സിലാകാം

ഒരു വിദ്യാർഥിയെ സംബന്ധിച്ച് പണം മുടക്കാതെ നടത്താവുന്ന, പ്രധാനപ്പെട്ടതും നേട്ടം ഉറപ്പുള്ളതുമായ നിക്ഷേപ ഇടമാണ് ക്യാംപസ്. വിദ്യാഭ്യാസം എന്ന വലിയ സമ്പത്തു വളർത്തിയെടുക്കാനുള്ള സ്ഥലം. പക്ഷേ, ഇവിടെ നിങ്ങൾ നിക്ഷേപിക്കേണ്ടത് പണം അല്ല. കാരണം പഠനച്ചെലവ് വഹിക്കുക പൊതുവേ മാതാപിതാക്കളായിരിക്കും. അതിനാൽ നിങ്ങളുടെ വിലപ്പെട്ട സമയവും സ്മാർട്ട് വർക്കും ആണ് ഇവിടെ നിക്ഷേപമായി മാറേണ്ടത്. നല്ലരീതിയിൽ ചെയ്താൽ ഈ നിക്ഷേപം നിങ്ങൾക്ക് അമ്പരപ്പിക്കുന്ന റിട്ടേൺ തരും. അതും ജീവിതകാലം മുഴുവൻ. ഭാവിയിൽ ലോകത്തെവിടെയും കടന്നുചെല്ലാനും വിജയങ്ങൾ കയ്യെത്തിപ്പിടിക്കാനും ഈ നിക്ഷേപം എന്നും എപ്പോഴും നിങ്ങൾക്കൊപ്പമുണ്ടാകും.

കോഴ്സ് തിരഞ്ഞെടുക്കുന്നതുമുതൽ ഏറെ ശ്രദ്ധ വേണം. ഭാവിസാധ്യതകളും തന്റെ മികവുകളും താൽപര്യങ്ങളും ആദ്യമേ പരിഗണിക്കണം. ഒപ്പം സാമ്പത്തികമടക്കമുള്ള സാഹചര്യങ്ങളും വിലയിരുത്തിവേണം കോഴ്സ് തിരഞ്ഞെടുക്കാൻ. അല്ലെങ്കിൽ ഇടയ്ക്കുവച്ച് കോഴ്സ് മുടങ്ങാം. നേട്ടം ഇല്ലാതാകും.

2. നിക്ഷേപിക്കണം നിങ്ങളിൽതന്നെ