കുട്ടികളെ വളർത്താം, പണം നൽകി

പണവും അതിന്റെ വിനിമയവും കുഞ്ഞുന്നാൾ മുതൽ കുട്ടികളെ പരിചയപ്പെടുത്തണം. കടയിൽ നിന്ന് സാധനങ്ങൾ വാങ്ങുന്നത് മുതൽ ബാങ്കിങ് ഇടപാടുകൾ വരെ ശീലിപ്പിക്കണം. സാമ്പത്തിക സാക്ഷരത പ്രധാനമാണ് ഇക്കാലത്ത്...

- പ്രമോദ് തോമസ്

പണത്തിന്റെ വിലയറിയിച്ച് വേണം കുട്ടികളെ വളർത്താനെന്ന് പണ്ടുമുതലേ പറച്ചിലുണ്ട്. കൈയിലുള്ള കാശ് എങ്ങനെ ഉത്തരവാദിത്തത്തോടെ കൈകാര്യം ചെയ്യാമെന്നത് മുതിർന്നവരും കുട്ടികളും കൃത്യമായി തന്നെ അറിഞ്ഞിരിക്കണം. എന്നാൽ വലിയ വിദ്യാഭ്യാസ യോഗ്യതയുള്ളവർ ഉൾപ്പെടെ പല സാമ്പത്തിക തട്ടിപ്പിലും ചെന്ന് ചാടുന്ന കഥകളാണ് ഓരോ ദിവസവും പുറത്തുവരുന്നത്. പൈസ എങ്ങനെ നന്നായി വിനിയോഗിക്കണമെന്ന് കൃത്യമായി ധാരണയില്ലാത്തവരുടെ കൈയിൽ നിന്ന് എളുപ്പത്തിൽ പണം തട്ടിച്ചെടുക്കാമെന്ന് പലരും ചിന്തിക്കുന്നിടത്താണ് തട്ടിപ്പുകളുടെ തുടക്കം.

ബാല്യത്തിൽ നൽകാം സാമ്പത്തിക സാക്ഷരത

സാമ്പത്തിക തട്ടിപ്പുകളിൽ നിന്ന് സ്വയം രക്ഷപ്പെടാനും പുതിയ തലമുറയെ രക്ഷപ്പെടുത്താനും ഏറ്റവും നല്ല വഴി സാമ്പത്തിക സാക്ഷരത നൽകുക എന്നതാണ്. ശരിക്ക് പറഞ്ഞാൽ, ഇത് പാഠ്യപദ്ധതിയുടെ ഭാഗമാക്കുകയാണ് വേണ്ടത്. എന്നാൽ, സമീപ ഭാവിയിൽ ഇതിനുള്ള സാധ്യത കാണാത്തതുകൊണ്ട്, മാതാപിതാക്കൾ മക്കളെ ചെറുപ്പം മുതലേ പണത്തെപ്പറ്റിയും, അതിന്റെ സവിശേഷതകളെപ്പറ്റിയും പഠിപ്പിക്കുന്നത് ഭാവിയിൽ പണം നല്ലരീതിയിൽ വിനിയോഗിക്കാൻ പ്രാപ്തരാക്കും.

പണം നമ്മുടെ ചങ്ങാതി

കുട്ടികളെ സാമ്പത്തിക സാക്ഷരരാക്കാൻ ശ്രമിക്കുന്ന നമ്മൾ ആദ്യം ചെയ്യേണ്ടത് എന്താണ് പണം എന്ന ആശയം അവരുമായി പങ്കുവെക്കുകയാണ്. രൂപ അവരെ കാണിച്ചു പരിചയപ്പെടുത്താം. ഇത് എങ്ങനെ ലഭിക്കുന്നു, അതിന്റെ ഉപയോഗങ്ങൾ എന്ത് എന്നൊക്കെ പറയാം. ഏതാണ്ട് രണ്ടര, മൂന്ന് വയസ്സോടു കൂടി മക്കൾക്ക് ഒരു ചെറിയ കുടുക്ക വാങ്ങി നൽകുക. എന്നിട്ട് ചെറിയ തുകകൾ നൽകുക.