ഡാൻസാണ് എന്റെ വർക്കൗട്ട്

 ‘ഭീഷ്മ പർവം’ ചിത്രത്തിലെ അടിച്ചുപൊളി നൃത്തരംഗത്തിലൂടെ വീണ്ടും മനംകവർന്നു റംസാൻ. ചെറുപ്രായത്തിൽ തുടങ്ങിയ നിരന്തര പരിശീലനങ്ങളുടെ വിജയപർവം

- എം. ഷിയാസ്

വേദികളുടെ വെള്ളിവെളിച്ചത്തിലേക്ക് കയറിയാൽ പിന്നെ, ഹൈവോൾട്ടേജിലാണ് റംസാന്റെ പെർഫോമൻസ്. ഈ ക്യൂട്ട് പയ്യന്റെ കണ്ടംപററി ഡാൻസ് ചുവടുകൾക്ക് ഒപ്പമെത്താൻ ഓട്ടോമാറ്റിക് ലൈറ്റുകൾ പെടും. ചടുലമായ സ്പോട്ട് ലൈറ്റുകൾ പോലും പാടു സ്റ്റെപ്പുകളും കില്ലർ ലുക്കുമായി കാണികളിലേക്ക് ഒരു ഊർജപ്രവാഹമായി തുളച്ചുകയറുന്ന റംസാന്റെ ഈ പാടവത്തിനു പിന്നിൽ വലിയ പരിശ്രമത്തിന്റെ കഥയുണ്ട്.

മാധ്യമം കുടുംബം ഫിറ്റ്നസ് ഫോക്കസ് പതിപ്പിന്റെ മുഖചിത്രത്തിന്റെ ഷൂട്ടിന് എറണാകുളം കലൂർ ഗോകുലം പാർക്കിലേക്ക് എത്തിയപ്പോഴും അതേ ഹൈ വോൾട്ട് എനർജിയിലാണ് റംസാൻ മുഹമ്മദ്. ജിമ്മിലെ അൽപനേരത്തെ വാംഅപ്പോടെ ഏത് പൊസിഷൻ ഷൂട്ടിനും പറ്റുന്ന വർക്കൗട്ട് മോഡിലായി താരം. ഇടക്കിടെ പാട്ടും മൂളി പൊളി മൂഡ്. ഒപ്പം ഇൻസ്റ്റയിലെ മെസേജുകളിലേക്ക് ഫോണിലൂടെ പാളിപ്പാളി നോട്ടവും.

ഷൂട്ടിന്റെ ഇടവേളയിൽ റംസാൻ ചാറ്റ്...

എങ്ങനെയാണ് ഡാൻസിലേക്ക്?

എറണാകുളം ജില്ലയിൽ മൂവാറ്റുപുഴയാണ് എന്റെ സ്വദേശം. സ്കൂളിൽ എൽ.കെ.ജി ക്ലാസിൽ ആന്വൽ ഡേക്ക് പെർഫോം ചെയ്താണ് തുടക്കം. മൂന്നാം ക്ലാസിലായപ്പോഴേക്കും ശാസ്ത്രീയ നൃത്തത്തിൽ അരങ്ങേറ്റം കഴിഞ്ഞു. അഞ്ചാം ക്ലാസിലും ഏഴാം ക്ലാസിലും വെച്ച് ചാനലുകളിൽ ഡാൻസ് റിയാലിറ്റി ഷോ ചെയ്തു. ഇന്ന് എന്നെ എല്ലാവർക്കും അറിയാവുന്നത് ഒരു ഡാൻസർ എന്ന രീതിയിലാണ്. അങ്കിൾ സമീറാണ് ഡാൻസിന്റെ ലോകത്തേക്ക് എന്നെ കൊണ്ടു വരുന്നത്. മേക്കപ് ആർട്ടിസ്റ്റായിരുന്നു അദ്ദേഹം.