ആഘോഷമാക്കാം പഠന നാളുകൾ...

ശാസ്ത്ര സാങ്കേതിക പിന്തുണയോടെ ഹൈടെക് പഠനരീതിയുടെ സാധ്യതകൾ പരമാവധി പ്രയോജനപ്പെടുത്തി അക്കാദമിക -ഇതര പ്രവർത്തനങ്ങളെ സമന്വയിപ്പിച്ചുള്ള പുതിയ അധ്യയന വർഷത്തെക്കുറിച്ച് മന്ത്രി സംസാരിക്കുന്നു...

- വി. ശിവൻകുട്ടി പൊതുവിദ്യാഭ്യാസവും തൊഴിലും വകുപ്പ് മന്ത്രി

കേരളീയ സമൂഹം എല്ലാ കാലത്തും ഗൗരവമായി ഇടപെടുന്ന മേഖലയാണ് സ്കൂൾ വിദ്യാഭ്യാസം. സംസ്ഥാന രൂപവത്കരണത്തിനു മുമ്പുള്ള കേരള ചരിത്രം പരിശോധിച്ചാലും ഇക്കാര്യം കാണാം.

സംസ്ഥാന രൂപവത്കരണത്തിനു മുമ്പ് തുടങ്ങിയ ഏതൊരു സ്കൂളിന്റെയും തുടക്കത്തെ കുറിച്ചുള്ള അന്വേഷണങ്ങൾ ചെന്നുനിൽക്കുക അസമത്വങ്ങൾക്കും അനാചാരങ്ങൾക്കും എതിരായി ആ നാട്ടിൽ നടന്ന കൂട്ടായ്മയിലും അവരുടെ പ്രവൃത്തികളിലും ആയിരിക്കും. നാട്ടിൽ നടന്ന മോചന പോരാട്ടങ്ങളുടെ രൂപത്തിലും ഭാവത്തിലും അവയുടെ കാരണങ്ങളിലും വൈവിധ്യം കാണാം. എന്നാൽ, ഇത്തരം കൂട്ടായ്മകളുടെ നീക്കിബാക്കിയായി കാണുന്നത് പൊതുവിദ്യാലയങ്ങൾ ആണെന്നതാണ് അതിൽ പ്രധാനം.

നവോത്ഥാന പ്രസ്ഥാനങ്ങളും വിവിധ ജാതി മതവിഭാഗങ്ങളുടെ പ്രവർത്തനങ്ങളും മിഷനറിമാരുടെ പ്രവർത്തനങ്ങളും വിദ്യാഭ്യാസ വ്യാപനത്തിൽ വലിയ പങ്കുവഹിച്ചിട്ടുണ്ട്. നവോത്ഥാന പ്രസ്ഥാനത്തിന്റെ തുടർച്ചയായി ഇടതു പക്ഷ പ്രസ്ഥാനങ്ങളുടെ സാമൂഹിക ഇടപെടൽ വിദ്യാഭ്യാസ വ്യാപനത്തെ ത്വരിതപ്പെടുത്തി. സഖാവ് ഇ.എം.എസിന്റെ നേതൃത്വത്തിൽ വന്ന ഒന്നാം കേരള മന്ത്രിസഭ ഭൂപരിഷ്കരണവും വിദ്യാഭ്യാസവും ഏറ്റവും പ്രധാന അജണ്ടയായെടുത്തു. തുടർന്നങ്ങോട്ട് കേരളത്തിന്റെ വിദ്യാഭ്യാസ മേഖലയുടെ വളർച്ച ചരിത്രമാണ്.

ഒന്നാം പിണറായി സർക്കാർ കൊണ്ടുവന്ന പൊതുവിദ്യാഭ്യാസ സംരക്ഷണ യജ്ഞവും രണ്ടാം പിണറായി സർക്കാർ കൊണ്ടുവന്ന വിദ്യാകിരണം പദ്ധതിയും നമ്മുടെ പൊതു വിദ്യാലയങ്ങളുടെ അടിസ്ഥാന സൗകര്യ വികസനത്തിൽ വിപ്ലവകരമായ മാറ്റങ്ങളാണ് കൊണ്ടുവന്നത്. ഏഴു വർഷം കൊണ്ട് 3000 കോടി രൂപയുടെ നിക്ഷേപമാണ് പൊതുവിദ്യാഭ്യാസ മേഖലയിൽ നടത്തിയത്.