കുഞ്ഞുവാവക്ക് മരുന്ന് നൽകുമ്പോൾ...---

ശിശുപരിചരണത്തിൽ വളരെ പ്രധാനപ്പെട്ടതാണ് അവർക്ക് മരുന്നുകൾ നൽകൽ. പൊതുവിൽ മരുന്ന് കഴിക്കാൻ കുട്ടികൾ മടികാണിക്കുന്നതിനാൽ മാതാപിതാക്കളെ സംബന്ധിച്ചിടത്തോളം ബുദ്ധിമുട്ടുണ്ടാക്കുന്ന ഒരു പ്രക്രിയയാണിത്

- ഡോ. ദിവ്യ സി.കെ

മുതിർന്ന വ്യക്തികളെപ്പോലെ അസുഖങ്ങൾ സൃഷ്ടിക്കുന്ന ബുദ്ധിമുട്ടുകളെക്കുറിച്ചോ മരുന്നുകളുടെ പാർശ്വഫലങ്ങളെക്കുറിച്ചോ പറയാൻ കഴിയാത്ത കുഞ്ഞുങ്ങൾക്ക് മരുന്നുകൾ കൊടുക്കുന്നത് അതിശ്രദ്ധ ആവശ്യമുള്ള കാര്യമാണ്.

കുഞ്ഞുങ്ങൾക്ക് അസുഖം വരു മ്പോൾ ഉടൻ വിദഗ്ധനായ ഡോക്ടറെ സമീപിച്ച് ഉപദേശങ്ങൾ തേടുന്നതാണ് ഏറ്റവും നല്ലത്. ശിശുപരിചരണത്തിൽ വളരെ പ്രധാനപ്പെട്ട ഒരുകാര്യമാണ് അവർക്ക് മരുന്നുകൾ നൽകൽ. പൊതുവിൽ മരുന്നുകൾ കഴിക്കാൻ കുട്ടികൾ മടികാണിക്കുന്നതിനാൽ മാതാപിതാക്കളെ സംബന്ധിച്ചിടത്തോളം വളരെ ബുദ്ധിമുട്ടുണ്ടാക്കുന്ന ഒരു പ്രക്രിയയാണ് അവരെ മരുന്ന് കഴിപ്പിക്കൽ. അതേസമയം, രോഗശമനത്തിന് കൃത്യമായ അളവിൽ, കൃത്യമായ സമയങ്ങളിൽ മരുന്നുകൾ നൽകേണ്ടത് അത്യാവശ്യവുമാണ്.

സ്വയം ചികിത്സ അരുത്

ഒരിക്കലും ഡോക്ടറുടെ നിർദേശമില്ലാതെ കുട്ടികൾക്ക് മരുന്നുകൾ നൽകരുത്. കാരണം, മരുന്നുകളുടെ അമിതമായ ഡോസുകളും പാർശ്വഫലങ്ങളും അവരുടെ ജീവനെത്തന്നെ അപകടത്തിലാക്കിയേക്കും. ഒരു രോഗത്തിന് ഡോക്ടർ കുറിച്ചുനൽകിയ മരുന്ന് പിന്നീട് അതേ രോഗലക്ഷണങ്ങൾ വരുമ്പോൾ കുട്ടികൾക്ക് കൊടുക്കു ന്നത് ആരോഗ്യകരമായ പ്രവണതയല്ല. കാരണം, വിവിധതരത്തിലുള്ള രോഗങ്ങൾക്ക് സമാനമായ രോഗലക്ഷണങ്ങൾ കാണപ്പെടുന്നതിനാൽ പലപ്പോഴും നേരത്തെയുള്ള പ്രിസ്ക്രിപ്ഷൻ അനുസരിച്ച് മരുന്നുകൾ വാങ്ങിയോ വീട്ടിൽ ബാക്കിയുള്ള മരുന്നുകളോ കുട്ടികൾക്ക് നൽകുന്നരീതി അപകടത്തിലേക്ക് നയിച്ചേക്കും.

ഉദാഹരണത്തിന് കുട്ടികൾക്ക് ബാക്ടീരിയ രോഗാണുബാധ മൂലമുണ്ടാകുന്ന പനിക്ക് പലപ്പോഴും പാരസെറ്റമോൾ സിറപ്പുകളുടെ കൂടെ ആന്റിബയോട്ടിക്കുകളും നിർദേശിക്കാറുണ്ട്. രോഗം ഭേദമായശേഷം കുഞ്ഞിന് എപ്പോൾ പനിവന്നാലും ഈ മരുന്നുകൾ മാതാപിതാക്കളുടെ ഇഷ്ടത്തിനനുസരിച്ച് നൽകുന്നത് അപകടമാണ്. കാരണം വൈറസ് ബാധമൂലവും മറ്റനേകം കാരണങ്ങളാലും പനിയുണ്ടാകാവുന്നതാണ്. ഇത്തരം സാഹചര്യത്തിൽ അനാവശ്യമായി ആൻറിബയോട്ടിക്കുകൾ നൽകുന്നത് കുഞ്ഞിന്റെ ശരീരത്തിൽ ആന്റിബയോട്ടിക്ക് റെസിസ്റ്റൻസ് (Antibiotic Resistance) എന്ന അവസ്ഥ സൃഷ്ടിക്കാൻ കാരണമായേക്കും.