സാന്ത്വനമേകി സർക്കാർ സംവിധാനങ്ങൾ

സാന്ത്വന പരിചരണ രംഗത്തെ സർക്കാർ ഇടപെടലുകളെ കുറിച്ചും പാലിയേറ്റിവ് പ്രസ്ഥാനത്തിന്റെ പ്രവർത്തന ഘടനയെ കുറിച്ചും...

- കെ.കെ. ബഷീർ [e-mail]

മരണം യാഥാർഥ്യമാണെങ്കിലും വേദനയില്ലാതെ, അന്തസ്സോടെയുള്ള മരണം ഓരോ രോഗിക്കും അനുഭവിക്കാൻ കഴിയണം. എന്നാൽ, ലോകത്താകമാനമുള്ള പരിചരണം ലഭിക്കേണ്ട രോഗികളിൽ 10 ശതമാനത്തിൽ താഴെ ആളുകൾക്ക് മാത്രമേ ആവശ്യമായ അളവിലുള്ള പരിചരണം ലഭിക്കുന്നുള്ളൂവെന്നാണ് പഠനങ്ങൾ സൂചിപ്പിക്കുന്നത്. സാന്ത്വന പരിചരണമാണ് അന്തസ്സുള്ള മരണം ഉറപ്പുവരുത്തുന്നത്. മാരക രോഗം ബാധിച്ച് ദുരിതവും വേദനയും പേറുന്നവർക്ക് വേദനസംഹാരികളും സ്നേഹപൂർണമായ പരിചരണവും നൽകി രോഗിയുടെയും കുടുംബത്തിന്റെയും അവസ്ഥയെ മെച്ചപ്പെ ടുത്തുന്നതിനാണ് സാന്ത്വന പരിചരണമെന്ന് ലോകാരോഗ്യ സംഘടന വിവക്ഷിക്കുന്നത്.

സാന്ത്വന പരിചരണമെന്നാൽ ജീവിതാന്ത്യം പ്രതീക്ഷിക്കുന്ന രോഗികൾക്കുള്ള പരിചരണമായി ആദ്യ കാലത്ത് കണക്കാക്കിയിരുന്നുവെങ്കിലും ഇപ്പോൾ ഗുരുതരമായേക്കാവുന്ന രോഗങ്ങൾ ബാധിച്ചവർക്ക് ചികിത്സയോടൊപ്പം സാന്ത്വന പരിചരണവും നൽകിവരുന്നു. മരണപ്പെടുന്നവരെ സംസ്കരിക്കുന്നതിലും ശേഷം കുടും ബാംഗങ്ങൾക്കാവശ്യമായ പിന്തുണ നൽകുന്നതിലേക്കും വരെ ഇന്ന് പാലിയേറ്റിവ് കെയർ വികസിച്ചിട്ടുണ്ട്. സാന്ത്വന പരിചരണം ആഗോള ആരോഗ്യ പരിരക്ഷയുടെ (Universal H ealth Coverage) അവിഭാജ്യഘടകം തന്നെയാണെന്നാണ് ലോകാരോഗ്യ സംഘടന വിവക്ഷിച്ചിട്ടുള്ളത്.

കേരള മാതൃക

സമൂഹ നന്മക്കായുള്ള പ്രവർത്തനങ്ങളിൽ ജനകീയ കൂട്ടായ്മയെന്നത് കേരളത്തിന്റെ ഒരു രീതിയാണ്. 2008ലാണ് കേരളം പാലിയേറ്റിവ് പരിചരണ നയം രാജ്യത്താദ്യമായി പ്രഖ്യാപിക്കുന്നത്. സർക്കാർ തലത്തിലും സന്നദ്ധ സംഘടന തലത്തിലുമുള്ള പ്രവർത്തനങ്ങളെ ഏകോപിപ്പിക്കുന്നതിന് ഈ പോളിസി വളരെയധികം പ്രയോജനം ചെയ്തിട്ടുണ്ട്. മാത്രമല്ല, ചുരുക്കം മെഡിക്കൽ കോളജുക ളോടനുബന്ധിച്ചും സാമൂഹിക, സന്നദ്ധ സംഘടനകളുടെ കീഴിലും ഒതുങ്ങിനിന്നിരുന്ന പാലിയേറ്റിവ് കെയർ പ്രസ്ഥാനത്തെ തദ്ദേശ സ്വയംഭരണ സ്ഥാപനങ്ങൾക്ക് കീഴിലുള്ള പ്രാഥമിക ആരോഗ്യ കേന്ദ്രങ്ങളിലേക്ക് വ്യാപിപ്പിക്കാൻ ഈ പോളിസി സഹായകരമായി.