മനസ്സിനെ മനസ്സിലാക്കുക

നല്ല വാക്ക്

ഏറ്റവും അരികിലുണ്ടായിട്ടും നിങ്ങളെ മനസ്സിലാക്കാൻ കഴിയാത്ത ഒന്നിനെക്കുറിച്ച് പറയാൻ ശിഷ്യരോട് ആവശ്യപ്പെട്ടതേ ഗുരുവിന് ഓർമയുള്ളൂ സഹപാഠിയെപ്പറ്റി, പങ്കാളിയെപ്പറ്റി, അയൽവാസിയെപ്പറ്റി, പ്രണയിനിയെപ്പറ്റി എന്നുവേണ്ട സഹോദരങ്ങളെയും മാതാപിതാക്കളെയും കുഞ്ഞുങ്ങളെയും കുറിച്ചുവരെ ഓരോരുത്തരായി പരിഭവപ്പെയ്ത് തുടങ്ങി. “ഇവരെക്കാളെല്ലാം അരികിലുണ്ടായിട്ടും നിങ്ങൾക്ക് മനസ്സിലാകാത്ത ഒന്നിനെക്കുറിച്ചു കൂടി പറയൂ" എന്നായി ഗുരു. ഉത്തരം കിട്ടാതെ ഏവരും പരസ്പരം നോക്കി. ഒടുവിൽ ഗുരു പറഞ്ഞു: “എന്റെ രണ്ടു ചോദ്യങ്ങൾക്കും ഉത്തരം ഒന്നാണ് -മനസ്സ്! നിങ്ങൾക്കു മാത്രമല്ല, എങ്ങോട്ടാണ് അതിന്റെ സഞ്ചാരമെന്ന് എനിക്കും പലപ്പോഴും പിടികിട്ടാറില്ല!'