પક્ષપલટાનું રાજકારણ કોંગ્રેસ સામે મોટો પડકાર

સર્વોચ્ચ અદાલતના ઉપરોક્ત આદેશથી શિવસેનાનાં બંને જૂથો હાલ રાહત અનુભવતા હોવાનું ભલે લાગે, પરંતુ રાજકીય ઘટનાક્રમની ગતિશીલતાને અવરોધી શકાતી નથી

મહારાષ્ટ્રમાં એકનાથ શિંદેની સરકાર સ્થાપિત થયા પછી પણ પક્ષપલટાના રાજકારણની ચર્ચા અને વિવાદનો અંત આવ્યો નથી. પક્ષ છોડી જનારા કે પક્ષથી અલગ થનારા સભ્યોને ગેરલાયક ઠરાવવાનો મામલો સર્વોચ્ચ અદાલતમાં છે અને અદાલતે મહારાષ્ટ્ર વિધાનસભાના નવા સ્પીકરને અદાલતનો આખરી નિર્ણય ન આવે ત્યાં સુધી સભ્યોની ગેરલાયકાત અંગે કોઈ પગલાં ન લેવાનું સૂચવ્યું છે. શિવસેનાના શિંદે જૂથ અને ઉદ્ધવ ઠાકરેની શિવસેના -બંને જૂથની અનેક અરજીઓ અદાલતમાં વિચારણાર્થે પડેલી છે અને મુખ્ય ન્યાયાધીશ રામન્નાએ કહ્યું છે કે આ અરજીઓની સુનાવણી માટે નવી બેંચની રચના કરવી પડશે. નવી બેંચ રચાય અને તે સુનાવણી હાથ ધરે એ પછી અદાલતનો નિર્ણય આવશે. તેમાં સમય લાગી શકે છે. પક્ષપલટા ધારાની જોગવાઈઓના અનુસંધાનમાં આ બાબતનો નિર્ણય આપણી સમજ પ્રમાણે સરળ અને સ્પષ્ટ લાગતો હોવા છતાં તેનાં કાનૂની અર્થઘટનો અને આંટીઘૂંટીનો ઉકેલ તો અદાલત મારફતે જ આવી શકે.