પાણીને પાણીના ભાવે ગણવું હવે ભારે પડશે

છેલ્લા બે દાયકામાં ઠંડા પીણાં કરતાંય બોટલ્ડ મિનરલ વૉટરનો બિઝનેસ સૌથી વધુ ઝડપે વધ્યો છે. તેનું કારણ સ્વાસ્થ્ય માટેની કાળજી અને ભારતમાં શુદ્ધ પીવાનું પાણી ના મળે ત્યારે બોટલ્ડ મિનરલ વૉટર પર જ આધાર રાખવો પડે

- દિલીપ ગોહિલ

તમારા ઘરમાં બોર છે? હોય જ ને, મ્યુનિસિપાલિટીનું પાણી આવતું હોય તો પણ બોર રાખવો પડે... તો હવે રજિસ્ટ્રેશન કરાવવું પડશે અને ૧૦,૦૦૦ રૂપિયા ભરવા પડશેઃ આ સમાચાર વાંચ્યા અને જાણ્યા હશે, પણ ભાગ્યે જ કોઈ ગંભીરતાથી નોંધ લીધી હશે. આવા સમાચાર આવે અને તેમાં મુદત આપવામાં આવી હોય, પણ આપણે જાણીએ છીએ કે સરકારી યોજનામાં મુદતો પડી જ રહે. ૩૦ સપ્ટેમ્બર સુધીમાં બોર કર્યો હશે તે બધાએ અરજી કરીને રજિસ્ટ્રેશન કરાવવાનું છે. ત્રણ મહિનામાં આખા દેશના બોર કે ટ્યૂબવેલ રજિસ્ટર થઈ જાય તેવું લાગતું નથી, પણ એક શરૂઆત થઈ છે.

કેન્દ્ર સરકારના જળસંપત્તિ વિભાગે આ નવો નિયમ જાહેર કર્યો છે અને સમગ્ર દેશમાં લાગુ પડશે. અત્યારે ઘણાં રાજ્યોમાં આ માટેના નિયમો છે પણ ખરા. પંચાયત કે પાલિકાની મંજૂરી પણ મેળવવાની હોય છે, પણ હવે સમગ્ર દેશમાં એકસમાન સ્થિતિ લાવવા માટેનો પ્રયાસ છે. કારણ સમગ્ર દેશમાં પાણી એક પ્રોબ્લેમ બનવાનું છે. માત્ર ભારતમાં જ નહીં, વિશ્વભરમાં વૉટર વૉરની સ્થિતિ ઊભી થઈ રહી છે.

બોરની મંજૂરી મળવાની છે એટલે તે સમસ્યા નથી, સમસ્યા એ છે કે હવે દર વર્ષે ૧૦,૦૦૦ રૂપિયાની ફી ભરવી પડશે. એક વાર બોર બનાવવાનો ખર્ચ કર્યો તે પછી ભૂગર્ભનું પાણી મફત, માત્ર લાઇટનું બીલ આવે. અંદાજે ૪૦૦ રૂપિયા લાઇટ બીલની સાથે હવે મહિને ૮૦૦ રૂપિયા પાણીના પણ આપવા પડશે. પાણીના હવે પૈસા આપવા પડશે. ખેતીના ટ્યૂબવેલને હાલમાં બાકાત રાખવામાં આવ્યા છે. ટ્યૂબવેલ અંગેના જુદા જુદા નિયમો રાજ્યો પ્રમાણે હોય છે. ભવિષ્યમાં ખેતી માટેના કૂવા અને ટ્યૂબવેલ માટે પણ એક સમાન નીતિ આવી શકે છે.