પ્રેમ, પઝેશન કે પ્રપંચ?

ઘણા કિસ્સાઓ આપણે એવા જોતા–સાંભળતા હોઈએ છીએ કે જ્યાં પ્રેમસંબંધમાં બંધાયા પછી કે લગ્ન થયાં પછી એક પાત્ર બીજા પાત્ર પર સખત બંધનો લાદતું હોય, પ્રેમથી કે ધાકથી. બીજું પાત્ર મોટા ભાગે શરણાગતિ સ્વીકારી પણ લેતું હોય છે, પરંતુ કોઈ પણ વ્યક્તિની પોતાની અસુરક્ષાની ભાવનાના કારણે અન્ય પાત્રએ મર્યાદિત થઈ જવું પડે એ બિલકુલ વાજબી બાબત ન ગણાય.

- ડો. મિતાલી સમોવા

આશ્કા રડતી-રડતી ઘરમાં દોડતી આવીને બૅડરૂમમાં ઘૂસી ગઈ. ધડામ કરતો રૂમનો દરવાજો બંધ કર્યો અને પથારી પર ઊંધા માથે પડીને રડવા લાગી. તેનું આખું શરીર ગુસ્સા, નફરત, નિરાશા અને ઘવાયેલી લાગણીઓના કારણે ધ્રુજી રહ્યું હતું. હાથપગમાંથી જાણે જીવ જતો રહ્યો હોય એમ એ તકિયાના ટેકે ક્યાંય સુધી પડી રહી. ઘરમાં કોઈ હતું પણ નહીં. રડતાં રડતાં એમ પડ્યા પડ્યા એ કયારે સૂઈ ગઈ એની એને ખબર ન પડી. સાંજે હીરે ઘરની ડૉરબેલ વગાડી ત્યારે ઊઠી. હીર તેની કૉલેજ ફ્રેન્ડ. ગ્રેજ્યુએશન પછી બંને બહેનપણીઓ એક જ ઑફિસમાં સાથે નોકરી પર લાગેલી અને સાથે જ રહેતી.

બપોરે ક્રિષ્નાએ આશ્કાની ઑફિસમાં જઈને જે તમાશો કરેલો એ પછી આશ્કા ખૂબ વ્યથિત થઈ ગયેલી. એ વિશે ફરિયાદ કરતાં આશ્કા હીરને કહેતી હતી, ‘જોયું ને તેં, આજે ઑફિસમાં ક્રિષ્નાએ શું કર્યું એ?! આ જ, એની આ જ વાત મને બિલકુલ નથી ગમતી. અત્યાર સુધી તો બસ મને એકલીને જ પજવતો હતો. હવે તો જાહેરમાં એની બદતમીજી બતાવે છે. એને એવું જ લાગે છે કે મારી આજુબાજુ જેટલા પુરુષો ભાઈ, મિત્રો, કલિગ્સ તરીકે હોય છે એ બધા ખરાબ જ છે અને બધા મને લાઇન મારે છે, આવા છે તેવા છે, મારા વિશે ખરાબ વાતો કરે છે એવું મને જૂઠું જૂઠું ભણાવે છે. એ બધાને મેં સીધા મોઢે પૂછી લીધેલું કે તમે મારા વિશે આવી વાતો કરો છો કે નહીં? તો બધાએ પોતાના સૌથી વહાલા વ્યક્તિના સમ ખાઈને ના પાડી દીધેલી. છતાં હજુ ક્રિષ્ના મને નાની કીકલી સમજીને બધાથી દૂર રાખવાનો જ પ્રયત્ન કર્યા કરે છે અને આજે તો ઑફિસમાં આવીને મારી બાજુના ટેબલે બેસતા મિહિર સાથે નકામી બબાલ કરી. હાથ પણ ઉપાડી દીધો.’

એટલામાં ડૉરબેલ વાગી અને ક્રિષ્નાએ દરવાજો ખખડાવ્યો. હમણાં સખત ગુસ્સે થયેલી પ્રેમિકા આશ્કાને હીરની હાજરીમાં પોતાના અઢળક વહાલ અને માફી માગવાની રીતથી મનાવી લીધી. જોકે આ કિસ્સામાં બિચારો મિહિર વગર વાંકે દંડાઈ ગયો. એનો વાંક એટલો કે તેણે એક એક્સ્ટ્રા પઝેસિવ વ્યક્તિની ગર્લફ્રેન્ડ સાથે ઑફિસમાં મિત્રતા કરી હતી.