રિયલ એસ્ટેટમાં મેટાવર્સના પ્રવેશનો માસ્ટરસ્ટ્રોક

છેલ્લા કેટલાક સમયથી મૅટાવર્સ ટૅક્નોલૉજીના આગમન અને તેના કારણે વિવિધ ક્ષેત્રોમાં આવનારા સંભવિત પરિવર્તનોને લઈને મોઢા એટલી વાતો થયા કરે છે. જોકે ભારતમાં તે નજીકના ભવિષ્યમાં મુખ્યધારાનાં જુદાં જુદાં ક્ષેત્રોનો ભાગ બને તેવા કોઈ એંધાણ દૂર દૂર સુધી વર્તાતા નથી, એવામાં અમદાવાદની એક કંપનીએ આ ટૅક્નોલૉજીનો રિયલ એસ્ટેટની દુનિયામાં પ્રવેશ કરાવીને ખરા અર્થમાં માસ્ટરસ્ટ્રોક ફટકારી દીધો છે.

૬ ઑગસ્ટ, ૨૦૨૨ને શનિવાર. સમયઃ સવારના ૧૧ વાગ્યાનો. સ્થળઃ અમદાવાદ સ્થિત હોટલ તાજનો ૧૭મો માળ. મંચ પર એક તરવરિયો યુવાન પ્રવેશ કરે છે અને ભવિષ્યના બારણે દસ્તક દેવાની એક પ્રક્રિયાનો વિધિવત્ રીતે આરંભ થાય છે. ત્યાં સુધી અહીં હાજર લોકોને ખ્યાલ નહોતો કે તેઓ એક ઐતિહાસિક કહી શકાય તેવી ઘટનાના સાક્ષી બનવા જઈ રહ્યા છે. એ યુવાનના આગમન સાથે જ સામાન્ય રીતે નીરસ અને મોટા ભાગે વન વે કૉમ્યુનિકેશનમાં ચાલતી રહેતી પત્રકાર પરિષદના માહોલમાં અણધાર્યું પરિવર્તન આવે છે. યુવાન પોતાની આત્મવિશ્વાસથી ભરપૂર ઉત્સાહી સ્પીચ અને પ્રોડક્ટ સંબંધિત બારીક જાણકારીઓ થકી ઉપસ્થિત ૫૦૦થી વધુ પત્રકારો, ઉદ્યોગ સાહસિકો, રિયલ એસ્ટેટના માંધાતાઓ અને બિઝનેસ ડેલિગેટ્સને ભવિષ્યની એક એવી દુનિયા તરફ દોરી જાય છે જેના વિશે હાજર સૌએ કેવળ વાતો જ સાંભળી હતી. યુવાન ઉપસ્થિત સૌ કોઈને મૅટાવર્સની મદદથી વર્ચ્યુઅલ રિયાલિટી પ્લેટફોર્મ દ્વારા ગિફ્ટ સિટી ગાંધીનગર ખાતે આકાર પામવા જઈ રહેલા શહેરી આવાસીય પ્રોજેક્ટનું ભવિષ્ય દર્શન કરાવે છે.