ટોક્સિક વડીલોને ક્લીન ચિટ ન આપો

એક સ્ત્રી પોતાનું બધું જ છોડીને સાસરે આવે છે જેથી તે પોતાના મનગમતા પુરુષ સાથે જીવન જીવી શકે, બાળકો પેદા કરીને ઉછેરી શકે, પોતાનું સુખી સમૃદ્ધ ઘર વસાવી શકે અને તેમાં પ્રેમથી બધાં સાથે હળીમળીને રહે, પણ પોતાના તરફથી બધું જ કરવા છતાં જો એને એનો પતિ જ મળતો ન હોય અથવા અવિશ્વાસ કે અપમાન જ મળે તો એ શું કરે?

- ડો. મિતાલી સમોવા

સિંહાલી મોન્ટાનાના ઘરે સવાર સવારમાં અચાનક આવી ગઈ. મોન્ટાના હજુ તો પતિ અને બાળકોને કામધંધે વળાવીને રસોડું સાફ કરવા અંદર ગઈ હતી. એમ તો બંને દસેક વર્ષથી એકબીજાનાં પડોશી હતાં એટલે એકબીજાનાં ઘરે આવવા જવાની નવાઈ ન હતી, પણ મોટા ભાગની મહિલાઓની જેમ તેઓ પણ સવાર સવારમાં દોડધામ હોય ત્યારે ઇમરજન્સી સિવાય એકબીજાને ત્યાં જતાં નહીં. ટોળટપ્પા કે અન્ય કામોનો બહેનોનો સમય મોટા ભાગે બપોરથી સાંજનો રહેતો. સિંહાલીને સીધી રસોડામાં આવીને ભોંય પર બેસી ગયેલી જોઈને મોન્ટાના ગભરાઈ ગઈ. શું થયું એવું પૂછવાની જરૂર ન હતી. નક્કી ઘરમાં સાસુ સાથે માથાકૂટ થઈ હશે એવું માની લીધું, પણ આજે વાત અલગ હતી. આજે સિંહાલી મોન્ટાનાને જે વાત કરવાની હતી તે તેના માટે આઘાતજનક હતી.