ભક્તિ ’ને જ્ઞાનના દિવ્ય સંગમ સરીખું પુસ્તક: શિવસ્તોત્રાવલિ

પુસ્તકની વાત કરીએ એ પહેલાં ચાલો, કલ્પનાવિહાર કરીને દસેક સદી પહેલાંના કાશ્મીરમાં જઈ પહોંચીએ!

- સ્પર્શ હાર્દિક

શિવજીના ભક્તો, સાધકો, પ્રેમીઓ માટે શ્રાવણનો વિશેષ મહિમા છે. આ ભક્તિપૂર્ણ દિવસોમાં ભોળાનાથ પ્રત્યે પોતાની ઉત્કટ લાગણીઓ વ્યક્ત કરવામાં ભક્ત અત્યંત આનંદ અનુભવે છે. આજે વાત કરવી છે એવા એક પુસ્તકની, જેમાં રચનાકારે શિવમય થઈને પોતાની પ્રબળ લાગણીઓને ભાતભાતના રંગે આલેખી છે. આ પુસ્તકનું વાંચન જાણે શિવ સાથે એક થઈને કોઈ અનેરો ઉત્સવ મનાવવા જેવું છે. પુસ્તકની વાત કરીએ એ પહેલાં ચાલો, કલ્પનાવિહાર કરીને દસેક સદી પહેલાંના કાશ્મીરમાં જઈ પહોંચીએ!