‘એનિમલ’ ફેમ તૃપ્તિ ડિમરી ડિજિટલ પ્લેટફોર્મનો શા માટે આભાર માને છે?

તૃપ્તિને પહેલી વખત સની દેઓલની સાથે ૨૦૧૭માં ‘પોસ્ટર બોય્ઝ'માં મોટા પડદે કામ કરવાની તક મળી હતી, પરંતુ તે ફિલ્મ ખાસ સફળ થઈ નહોતી. તૃપ્તિ ડિમરી ‘બુલબુલ' અને ‘લૈલા મજનૂ' જેવી ફિલ્મોમાં લીડ રોલ ભજવી ચૂકી છે.

- પાર્થ દવે

‘એનિમલ' ફિલ્મમાં ટૂંકો રોલ હોવા છતાં ‘નેશનલ સેન્સેશન' બનેલી અભિનેત્રી તૃપ્તિ ડિમરીએ તાજેતરમાં જ મુંબઈમાં એક વૈભવી બંગલો ખરીદતાં ફરીથી ચર્ચામાં આવી છે. તૃપ્તિએ બાંદ્રામાં ૧૪ કરોડ રૂપિયાનો વૈભવી બંગલો ખરીધો છે. ત્રણ ફ્લોર ધરાવતો આ બંગલો ૨૧૯૩ સ્ક્વેર ફીટમાં ફેલાયેલો છે અને તે તૃપ્તિએ મેરી ફર્નાન્ડિસ નામના વ્યક્તિ પાસેથી ખરીધો છે. બહુ જ ટૂંકા સમયમાં અને ખાસ તો ‘એનિમલ’ ફિલ્મથી જાણીતી થયેલી તૃપ્તિ ડિમરી કોણ છે? અને તેની ‘ એનિમલ’ ફિલ્મ સુધીની સફર કેવી હતી? આવો જાણીએ.

પહાડો કી લડકી

તૃપ્તિ ડિમરી ઉત્તરાખંડના ગરવાલના સુંદર પહાડોની વચ્ચે ઊછરી છે. તેનો જન્મ ૨૩ ફેબ્રુઆરી, ૧૯૯૪ના રોજ મીનાક્ષી અને દિનેશ ડિમરીના ઘરે થયો હતો. તેણે દિલ્હી પબ્લિક સ્કૂલ, ફિરોઝાબાદમાંથી અભ્યાસ કર્યો છે. શ્રી અરબિંદો કોલેજમાંથી મનોવિજ્ઞાન વિષયમાં ગ્રેજ્યુએટ થયેલી તૃપ્તિએ બાદમાં એફ્ટીઆઈઆઈ, પુણેમાંથી અભિનયની તાલીમ લીધી છે.

પહેલી ફિલ્મ

તૃપ્તિને પહેલી વખત સની દેઓલની સાથે ૨૦૧૭માં ‘પોસ્ટર બોય્ઝ' નામની ફિલ્મમાં મોટા પડદે કામ કરવાની તક મળી હતી, પરંતુ આ ફિલ્મ ખાસ સફ્ળ થઈ નહોતી. મુખ્ય અભિનેત્રી તરીકેની તૃપ્તિની પહેલી ફિલ્મ ૨૦૧૮ની ‘લૈલા-મજનૂ' હતી, જે એક રોમેન્ટિક લ્મિ હતી અને એમાં તેણે લૈલાનો રોલ કર્યો હતો. આ ફિલ્મ અને ફિલ્મનાં ગીતોથી તૃપ્તિ અને તેના સાથી કલાકાર અવિનાશ તિવારીને થોડીઘણી ખ્યાતિ મળી હતી.

ત્યાર બાદ દર્શકોનું ધ્યાન તૃપ્તિ તરફ ખેંચાયું ‘બુલબુલ’ ફિલ્મથી, જેમાં તેણે મુખ્ય અભિનેત્રી તરીકે કામ કર્યું હતું. તેણે ભજવેલા ‘બુલબુલ’ના રોલના બધાએ ખૂબ જ વખાણ કર્યા હતા. ત્યાર પછી તેણે કરેલી ફિલ્મ 'લા'એ પણ ખાસ્સી એવી લોકચાહના અપાવી હતી. 'કલા' ફિલ્મમાં તેણે જે રીતે પોતાના રોલની લાગણીઓને પોતાના અભિનયમાં રજૂ કરી, તેના આલોચકોએ ખૂબ વખાણ કર્યા હતા. ૨૦૨૩માં આવેલી ફિલ્મ ‘એનિમલ'થી તો તૃપ્તિની લોકપ્રિયતા આસમાને પહોંચી ગઈ અને આજે તે બોલિવૂડનો એક જાણીતો ચહેરો બની ગઈ છે.