એનાલિસિસ.

ભાજપનો જાદુ બધાં જ રાજ્યોમાં ઓસરી રહ્યો છે?

- સુધીર એસ. રાવલ

હજુ હમણાં જ લોકસભા ચૂંટણીનાં પરિણામો આવ્યાં અને ભાજપને ગઈ ચૂંટણી કરતાં ઘણી ઓછી બેઠકો મળી, ત્યારે એક વાત તો સિદ્ધ થઈ જ હતી કે, વડાપ્રધાનની લોકપ્રિયતા અને ભાજપની કહેવાતી સંગીન રણનીતિની સફળતાનો ગ્રાફ નીચો ગયો છે, પરંતુ લોકસભા ચૂંટણીના એક જ મહિનામાં ભાજપને જે બીજો આંચકો લાગ્યો છે તે ભાજપ માટે વધુ ચિંતાજનક છે. સાત રાજ્યોની ૧૩ વિધાનસભા બેઠકો પર યોજાયેલી પેટા ચૂંટણીમાં ઇન્ડિયા ગઠબંધને ૧૦ બેઠકો જીતી લઈને રાજકીય વર્તુળોમાં આશ્ચર્ય જન્માવ્યું છે. ભાજપને માત્ર બે જ બેઠકો મળી છે. એક બેઠક અપક્ષને ફાળે ગઈ છે. પેટાચૂંટણીમાં કોંગ્રેસે પર્વતીય રાજ્યો હિમાચલ પ્રદેશ અને ઉત્તરાખંડમાં કમાલ કરી છે, જ્યારે મમતા બેનર્જીની તૃણમૂલ કોંગ્રેસે પશ્ચિમ બંગાળમાં ક્લીન સ્વીપ કરી છે. દેશમાં પશ્ચિમ બંગાળમાં ચાર બેઠકો, હિમાચલ પ્રદેશમાં ત્રણ બેઠકો, ઉત્તરાખંડમાં બે બેઠકો અને પંજાબ, મધ્યપ્રદેશ, બિહાર તથા તામિલનાડુમાં વિધાનસભાની એક-એક બેઠક પર પેટાચૂંટણી યોજાઈ હતી. પંજાબમાં આમ આદમી પાર્ટી જીતી છે. જે ૧૩ બેઠકો પર પેટાચૂંટણી થઈ તેમાં મધ્યપ્રદેશની અમરવાડા, બિહારની રૂપૌલી, પંજાબની જાલંધર પશ્ચિમ, પશ્ચિમ બંગાળની રાનાઘાટ દક્ષિણ, રાયગંજ, બાગદા, માનિકતલા, હિમાચલ પ્રદેશની હમીરપુર, દેહરા અને નલગઢ, ઉત્તરાખંડની બદ્રીનાથ, મંગલોર અને તામિલનાડુની વિક્રવંડી વિધાનસભા બેઠકો પર ૧૦ જુલાઈએ મતદાન થયું હતું. કુલ મળીને આ પેટાચૂંટણીમાં કોંગ્રેસે ચાર, તૃણમૂલ કોંગ્રેસે ચા૨, ભાજપે બે અને આપ, ડીએમકે અને અપક્ષોએ એક-એક બેઠક જીતી છે. આશ્ચર્ય એ વાતનું છે કે હજી થોડાક દિવસ પહેલાં જ લોકસભા ચૂંટણીમાં ઉત્તરાખંડમાં કોંગ્રેસનું ખાતું પણ ખૂલી શક્યું નહોતું અને હવે ત્યાં કોંગ્રેસે ક્લીન સ્વીપ કરીને બંને બેઠકો પર કબજો જમાવ્યો છે. મંગલોર વિધાનસભા બેઠક પર કોંગ્રેસના કાજી નિઝામુદ્દીને ભાજપના કરતારસિંહ ભડાનાને હરાવ્યા હતા અને બદ્રીનાથ વિધાનસભા બેઠક પર કોંગ્રેસના લખપતસિંહ બુટોલાએ ભાજપના ઉમેદવાર રાજેન્દ્રસિંહ ભંડારીને હરાવ્યા હતા.

અયોધ્યા પછી બદ્રીનાથ :