રાજકાજ

દિલ્હીની આઇએએસ કોચિંગ હોનારત જવાબદારોને શું સજા થશે?

પ્રશાસન અથવા વહીવટના પાઠ હવે આપણને હોનારત દ્વારા શીખવા મળે છે. દિલ્હીમાં એક આઇએએસ સ્ટડી સર્કલની બેઝમૅન્ટમાં આવેલી લાઇબ્રેરીમાં વરસાદના પાણી અચાનક ધસી આવવાને કારણે ત્રણ વિદ્યાર્થીઓનાં મૃત્યુની ઘટનાએ દિલ્હીમાં એકાએક સૌની ઊંઘ હરામ કરી દીધી છે. ૨૭ જુલાઈના રોજ બનેલી આ ઘટના હવે વિવિધ તપાસસમિતિઓનાચક્રવ્યૂહમાંથી કેવા નિષ્કર્ષ સુધી પહોંચે છે એ જોવાનું રહેશે. વહીવટી તપાસ ઉપરાંત કેન્દ્ર સરકારે સાત સભ્યોની એક ઉચ્ચસ્તરીય સમિતિની રચના કરી છે. એ સમિતિ આ ઘટના માટે કોણ જવાબદાર છે તે નક્કી કરશે. નીતિમાં પરિવર્તન માટે ભલામણ કરશે. સમિતિનો રિપોર્ટ એક મહિનામાં આવશે. આવી હોનારત ફરી ન બને તે માટે શું કરવું જોઈએ તેના ઉપાયો પણ સમિતિએ સૂચવવાના છે. દિલ્હીના લેફ્ટનન્ટ ગવર્નર વી.કે. સક્સેના પણ સક્રિય બન્યા છે. ૨૯ જુલાઈએ તેઓ ઘટના સ્થળે પહોંચ્યા અને વિદ્યાર્થીઓ સાથે વાતચીત કરી હતી. આ ઘટના માટે ફાયરબ્રિગેડ, પોલીસ અને દિલ્હી નગર નિગમના અધિકારીઓમાંથી જે જવાબદાર હશે તેમની સામે કાર્યવાહી કરવાની ખાતરી અપાઈ છે.