એનાલિસિસ

દેશમાં વધી રહેલા શાસકીય સંકટ માટે જવાબદાર કોણ?

- સુધીર એસ. રાવલ

૪ જૂન, ૨૦૨૪ પછી દેશમાં રાજકીય વાતાવરણ ખૂબ ઝડપથી બદલાવા લાગ્યું છે. સતત ૧૦ વર્ષ સુધી એકચક્રી શાસન પછી હવે સાથી પક્ષોના ટેકાના ઉછીના સહારે ચાલતી કેન્દ્ર સરકાર ધીરે-ધીરે ચારે બાજુથી ઘેરાવા લાગી છે. રાજકીય વાતાવરણ બદલાતા તેની અસર શાસકીય વ્યવસ્થા પર પણ પડી છે. લોકશાહીમાં સત્તાપલટ અને રાજકીય ઊથલપાથલ કંઈ નવી વાત નથી, પરંતુ મોદી સરકારે આજ સુધી જે દબદબાથી રાજ કર્યું, તેની સામે હવે વિપક્ષોની તાકાત વધી જતાં ‘લોકશાહી, નિયમો, બંધારણ, વગેરે..વગેરે..’ આવું બધું જે સ૨કા૨ને પહેલાં તકલીફરૂપ નહોતું લાગતું, તે હવે કષ્ટદાયક બનવા લાગ્યું છે! આટલું ઓછું હોય તેમ સાથીઓના વર્તનમાં પણ જે ફેરફાર આવ્યો છે, તે સરકારને ભારે અકળાવે છે. પક્ષની આંતરિક બાબતોમાં વડાપ્રધાન અને ભાજપના હાઇકમાન્ડનો પ્રભાવ તથા અંકુશ ઘટી રહ્યાનાં અનેક પ્રમાણો રોજેરોજ બહાર આવી રહ્યાં છે. એકતરફ સંસદનું બજેટ સત્ર ચાલુ છે અને બીજી તરફ ઉત્તર પ્રદેશ જેવા મહત્ત્વના રાજ્યમાં ભાજપની સ્થિતિ અત્યંત વિસ્ફોટક બની ગઈ છે. ઉત્તર પ્રદેશના મુખ્યમંત્રી યોગી આદિત્યનાથને બદલવાની યોજના પાર પાડી શકાતી નથી અને નવા નવા પ્રશ્નોમાં ભાજપનું હાઇકમાન્ડ ગૂંચવાયા કરે છે. પક્ષપ્રમુખ જે. પી. નડ્ડાની મુદત પુરી થઈ ગઈ છે, પણ નવા પ્રમુખ કોને બનાવવા, તે નિર્ણય ભાજપ અને સંઘ સાથે મળીને કરી શકે તે સ્થિતિ હવે રહી નથી. સત્તાની મુદત સમાપ્ત થવા છતાં સંગઠનના પદાધિકારીઓમાં ફેરબદલ થઈ શકતા નથી અને મુખ્યમંત્રીઓની મુદત ચાલુ હોય છતાં તેને બદલી નખાય છે! ભાજપની આવી નીતિ-રીતિ સામે હવે ભાજપમાં જ ઉગ્ર વિરોધ થઈ રહ્યો છે. ભાજપની નબળી પડતી રાજકીય સ્થિતિની વહીવટ પર અસર દેખાય છે, તેનું તાજું ઉદાહરણ નીતિ આયોગની તાજેતરમાં દિલ્હીમાં મળેલી બેઠક છે.

નીતિ આયોગની બેઠકમાં તડાફડી :