વન મેન આર્મી : એકલા હાથે ૨ લાખ વૃક્ષોથી શહેરને ગ્રીન સિટી બનાવ્યું

રોજ જાતે ટેમ્પો ચલાવીને પાણી પાય છે. ભાવનગર નગરીની મુલાકાત લેશો તો તમામ એરિયામાં ગ્રીન સિટી, ગ્રીન સિટી લખેલા ટ્રીગાર્ડ જોવા મળશે અને આ વાતની સાક્ષી પૂરતાં વૃક્ષો જોવા મળશે. તેમણે માત્ર પોતાનો જ એકમાત્ર આ કાર્યક્રમ ન બની રહે તે માટે ગ્રીન સિટી સંસ્થાની સ્થાપના કરીને તેમાં વિવિધ સામાજિક, શૈક્ષણિક સંસ્થાઓ, બિઝનેસ કંપનીઓ નગરજનોને જોડી દીધા છે અને તેમની નેતૃત્વ કામગીરીને લીધે આજે ૧૫ વર્ષે આ પરિણામ મળી રહ્યું છે.

- જિજ્ઞેશ ઠાકર

માણસ ધારે તે કરી શકે છે, નથિંગ ઇઝ ઇમ્પોસિબલ..આ બધું કહેવાતું આવ્યું છે, પરંતુ કેટલાક વ્યક્તિઓને જોઈએ તો એ વાત ચરિતાર્થ થતી પણ જોઈ શકાય છે. આવી જ વાત ભાવનગરના યુવા બિઝનેસમેન દેવેનભાઈ શેઠને લાગુ પડે છે. તેમણે ભાવેણા નગરીને હરિયાળું બનાવવાનો ૧૫ વર્ષ પહેલાં સંકલ્પ લીધો હતો. તેઓ બિઝનેસ પરિવારના છે. દોઢ દાયકા દરમિયાન તેમણે ગ્રીન સિટી નામની સામાજિક, પર્યાવરણીય સંસ્થા શરૂ કરી અને સમગ્ર શહેરના અલગ-અલગ વિસ્તારોમાં અત્યાર સુધીમાં બે લાખ જેટલાં વૃક્ષો વાવીને ઉછેર કર્યા હોવાનો તેમનો દાવો છે અને તમે ભાવનગર નગરીની મુલાકાત લેશો તો તમામ એરિયામાં ગ્રીન સિટી, ગ્રીન સિટી લખેલા ટ્રીગાર્ડ જોવા મળશે અને આ વાતની સાક્ષી પૂરતાં વૃક્ષો જોવા મળશે.