હેલ્થ સ્પેશિયલ વિનોદ પંડ્યા

આજના યુગના હાર્ટના કેટલાક હૃદયગમ્ય ઉપચારો

- વિનોદ પંડ્યા

હમણાંનાં અખબારોમાં હૃદયરોગથી થતાં મરણ, ખાસ કરીને નાની વયનાં મરણોની ખાસ નોંધ લેવામાં આવે છે. કોરોના સંકટ બાદ આવાં મરણોની ખાસ નોંધ લેવાય છે, પરંતુ કોરોના સંકટ અગાઉ હૃદયરોગ થી થયેલાં મરણોની ખાસ નોંધ લેવાતી ન હતી. ત્યારના અને હમણાંના આંકડાઓ સરખાવવાથી ખરી જાણ થઈ શકે કે યુવાનોમાં હૃદયરોગ અને મૃત્યુનું પ્રમાણ વધ્યું છે કેમ? જોકે હમણાંના સમયમાં યુવાનોમાં હૃદયરોગથી થતાં મરણનું પ્રમાણ દેખીતી રીતે વધ્યું છે. તે માટે તબીબો કોરોનાની બીમારીને નહીં, પરંતુ આજના સમયની જીવનશૈલી અને ખોરાકની બદલાયેલી તરાહ તેમ જ નબળી ગુણવત્તાને જવાબદાર માને છે.

હકીકત જોઈએ તો વિશ્વભરમાં હૃદયરોગ સૌથી વધુ જીવ લેનારી બીમારી બની ગઈ છે. કૅન્સર કરતાં પણ હ્રદયરોગ વધુ લોકોના જીવ લે છે. તમામ પ્રકારનાં કૅન્સરોથી મરતાં લોકો કરતાં પણ વધુ લોકો હૃદયરોગથી મરે છે. દુનિયાભરની હેલ્થકૅર સિસ્ટમ પર હૃદયરોગને કારણે સૌથી મોટો આર્થિક બોજ પડે છે, પરંતુ સારી વાત એ છે કે હૃદયરોગની સારવારમાં કેટલીક નવી અને ક્રાંતિકારી શોધો થઈ રહી છે. બાયોટૅક્નોલૉજી અને મેડિકલ ટૅક્નોલૉજી નિદાનથી માંડીને રોગને આવતો નિવારવામાં, આવી જાય તો સારવારમાં ઘણી આગળ વધી ગઈ છે.

હૃદયરોગ સુખી દેશોમાં એક ખૂબ મોટી સમસ્યા છે. વિકસિત દેશોની ચાલીસ ટકા પ્રજા કાં તો હૃદયરોગથી પીડાઈ રહી છે અથવા તેઓને હૃદયરોગ લાગુ પડશે. હવે તો હ્રદયરોગ વિકસી રહેલા દેશો માટે પણ મોટી તેના સમસ્યા બની રહ્યો છે. ત્યાં સુધી કે આફ્રિકાના દેશોમાં ટીબી, એચઆઈવી અને મલેરિયાથી મળીને કુલ જેટલા લોકો મરણ પામે છે, કરતાં વધુ હ્રદયરોગથી મરે છે. તેનાં અનેક કારણોમાંથી એક કારણ એ પણ છે કે, લોકોનું સરેરાશ આયુષ્ય વધ્યું છે. આખરે એક દિવસ શરીરની નળીઓ અને હૃદય જેવાં તંત્રો ઘસાઈ જાય છે, બગડી જાય છે. કોઈક કારણસર માણસે મરવાનું તો છે. બુઢાપામાં હૃદયરોગથી મરણ થાય તે ચિંતાનું કારણ ન ગણાય, પણ હમણાંના સમયમાં યુવાનોનાં પણ વધુ મોત થાય છે.