ఈవారం కథ

డాక్టరు గారు

డాక్టర్ అప్పారావు గారిని ఇక్కడ అస్సలూహించలేదు. ఆయన మీద నాకు అంత మంచి అభిప్రాయమేమీ లేదు. ఆయన చేతి చలువ గురించి అంతా బాగా చెప్పుకుంటారు. వంక పెట్టింది ఎవ్వరూ లేరు మా పట్టణం లో అయితే ఆయన డబ్బు వ్యామోహం మాత్రం జగమెరిగిన సత్యం. ఆయన.. అదీ ఇక్కడ. గతంలోకి జారుకున్నాను.

                        ***                   ***                  ***

సాలూరు లో బ్యాంకు మేనేజర్ గా ట్రాన్సఫర్ మీద వచ్చాను. ఈ ఊళ్ళో తెలిసిన వాళ్ళెవరూ లేరు ఒక్క శేఖరం తప్ప. వచ్చిన వారంలోనే ఆరోగ్యం రోజు కడుపులో నొప్పి, వాంతులు. ఊళ్ళో పెద్దగా ఆధునిక ఆసుపత్రులేమీ లేవు.గవర్నమెంట్ ఆసుపత్రి ఉంది కానీ కొంచెం తాహతు ఉన్నవారు అటువైపు చూడడం తక్కువ. బ్యాంకులో ఉండగా ఇబ్బంది వచ్చినందున అక్కడి ఉద్యోగుల్ని వాకబు చేస్తే డాక్టర్ అప్పారావు గారి గురించి చెప్పారు. వెంటనే ఆయన దగ్గరకు తీసుకు వెళతామన్నారు. సరేనన్నాను.

డాక్టరు గారు చూసి హాస్పిటల్ లో జాయిన్ అవ్వాలని చెప్పారు. చేతికి సెలైన్ ఎక్కించారు.

నన్ను చూడడానికి శేఖరం వచ్చాడు.

" ఇప్పుడెలా ఉందిరా?” 

" కొంచెం బాగుందిరా. రెండ్రోజులు బెడ్ మీద ఉండాలని చెప్పారు.” 

' అప్పారావు గారు మంచి డాక్టర్ రా. జబ్బు తగ్గడం గ్యారెంటీ. అలాగే డబ్బు తగ్గడం కూడా డబుల్ గ్యారెంటీ.” 

" జబ్బు తగ్గితే చాలు కదరా. డబ్బు ఎక్కడ మాత్రం ఖర్చవ్వదు?” 

" అవుననుకోరా. కానీ బొత్తిగా మొహమాటం లేని మనిషి. ఫలానా ఇంత అంటే అంత ఇవ్వాల్సిందే. లేకపోతే కుదరదంటాడు. డిస్కౌంట్ అడిగితే 'కూరగాయల బేరాలు చేయొద్దంటూ' కసురుకుంటాడు.

”సరే లేరా. అవన్నీ మనకెందుకు? ఉపశమనం కలిగింది చాలు. "అంటూ ఆ వాదన కు ముగింపు పలికాను.

రెండ్రోజుల తర్వాత డాక్టర్ గారు డిశ్చార్జ్ చేస్తూ చెప్పారు “ ప్రస్తుతానికి మీకు సమస్య తగ్గింది. గాల్ బ్లాడర్ లో రాళ్లున్నాయి. ఎప్పటికైనా మీకు ఆపరేషన్ చెయ్యాల్సి వస్తుంది. తొందరేం లేదుగానీ మీరు అందుకు సిద్ధంగా ఉండండి.” 

" మీరు చేస్తారా?