அரசு மருத்துவமனைகளில் புதிய கட்டுப்பாடுகள்

நோயாளிகளுடன் வருவோருக்கு அடையாளப் பட்டை; பாதுகாப்பு சோதனை

தமிழகம் முழுவதும் அரசு மருத்துவமனைகளின் பாதுகாப்பை மேம்படுத்தும் வகையில், நோயாளிகளுடன் வருவோருக்கு அடையாளப் பட்டை, பாதுகாப்பு பரிசோதனை (மெட்டல் டிடெக்டர்), சிசிடிவி கேமரா வசதிகள் ஏற்படுத்தப்படும் என்று மக்கள் நல்வாழ்வுத் துறை அமைச்சர் மா.சுப்பிரமணியன் தெரிவித்தார்.

கத்திக்குத்து சம்பவத்தில் காயமடைந்து சென்னை கிண்டி கலைஞர் நூற்றாண்டு உயர் சிறப்பு மருத்துவமனையில் சிகிச்சை பெற்று வரும் மருத்துவர் பாலாஜியை அமைச்சர் மா.சுப்பிரமணியன் வியாழக்கிழமை சந்தித்து நலம் விசாரித்தார்.

அதைத் தொடர்ந்து, மருத்துவமனைக்கு நோயாளிகளுடன் வருவோருக்கு கைகளில் அணியும் அடையாளப் பட்டை வழங்கும் நடைமுறையை அவர் தொடங்கிவைத்தார். அதன் பின்னர், கீழ்ப்பாக்கம் மருத்துவக் கல்லூரி மருத்துவமனையிலும் அந்த சேவையை அமைச்சர் அறிமுகப்படுத்தினார்.

இதையடுத்து, மருத்துவக் கல்வி இயக்குநரகத்தில் நடைபெற்ற செய்தியாளர்கள் சந்திப்பில் அமைச்சர் கூறியதாவது:

மருத்துவர் பாலாஜிக்கு அளிக்கப்படும் சிகிச்சைகள் குறித்து தொடர்ந்து கண்காணித்து வருகிறோம். அவருக்கு ஏற்கெனவே 'பேஸ் மேக்கர்' பொருத்தப்பட்டுள்ளதால் அதுகுறித்த மருத்துவ பரிசோதனை நடத்தப்பட்டு, செயல்பாடுகள் சீராக இருப்பது உறுதி செய்யப்பட்டுள்ளது.

இதையடுத்து, தீவிர சிகிச்சை பிரிவில் இருந்த மருத்துவர் பாலாஜி தனி அறைக்கு மாற்றப்பட்டுள்ளார். அவர் நலமுடன் இருக்கிறார். பாலாஜியை கத்தியால் தாக்கிய விக்னேஷ் மீது கடுமையான ஏழு சட்டப் பிரிவுகளின் கீழ் வழக்குப் பதிவு செய்யப்பட்டு, அவர் புழல் சிறையில் அடைக்கப்பட்டுள்ளார்.

புதிய சீர்திருத்தங்கள்: சுகாதாரத் துறை சார்பில் தமிழகத்தின் மருத்துவக் கட்டமைப்புக்கு என்னென்ன புதிய சீர்திருத்தங்கள் கொண்டு வரலாம் என்பது குறித்து கடந்த ஆகஸ்ட் மாதம் தலைமைச் செயலர் தலைமையில் உயர் அலுவலர்களுடனான ஆலோசனைக் கூட்டம் நடைபெற்றது.