ஏழைகளின் எதிரி காங்கிரஸ்: பிரதமர் மோடி

'ஏழைகள் முன்னேறிவிடக் கூடாது என்பதே காங்கிரஸின் மனநிலை; அக்கட்சி, ஏழைகளின் எதிரி என்று பிரதமர் நரேந்திர மோடி கடுமையாக விமர்சித்தார்.

288 உறுப்பினர்களைக் கொண்ட மகாராஷ்டிர சட்டப் பேரவைக்கு நவம்பர் 20-ஆம் தேதி ஒரே கட்டமாக தேர்தல் நடைபெறவுள்ளது. மாநிலத்தில் ஆளும் மகாயுதி கூட்டணிக்கும் (பாஜக-முதல்வர் ஏக்நாத் ஷிண்டே தலைமையிலான சிவசேனை-துணை முதல்வர் அஜீத் பவார் தலைமையிலான தேசியவாத காங்கிரஸ் உள்ளிட்ட கட்சிகள்), எதிர்க்கட்சிகளின் மகா விகாஸ் அகாடி கூட்டணிக்கும் (காங்கிரஸ்-சிவசேனை (உத்தவ்)-தேசியவாத காங்கிரஸ் (சரத் பவார்) உள்ளிட்ட கட்சிகள்) இடையே கடும் போட்டி நிலவுகிறது.

சத்ரபதி சம்பாஜிநகர், பன்வல் ஆகிய பகுதிகளில் வியாழக்கிழமை நடைபெற்ற பாஜக பிரசாரக் கூட்டங்களில் பங்கேற்ற பிரதமர் மோடி பேசியதாவது:

ஏழைகளை தொடர்ந்து வறுமையிலேயே வைத்திருக்க வேண்டும் என்பதே காங்கிரஸின் செயல்திட்டம். அக்கட்சிக்கு வாக்கு வங்கி அரசியல் மட்டுமே பிடிக்கும்; ஏழைகள் முன்னேறுவதோ, அவர்கள் பலனடைவதோ பிடிக்காது.