குழந்தைகள் பிணியின்றி வாழ்தல் இனிது!

இந்தியாவில் ஐந்து வயதுக்குட்பட்ட குழந்தைகளில் 38.9% குழந்தைகள் தேவையான அளவுக்கு வளர்ச்சி பெறவில்லை என மாநிலங்களவையில் தெரிவிக்கப்பட்டுள்ளது.

- முனைவர் என். மாதவன்

இது இந்திய குழந்தைகளில் மூன்றில் ஒருவர் என்பது குறிப்பிடத்தக்கது. பெண்கள் மற்றும் குழந்தைகள் நல்வாழ்வுத் துறை அமைச்சர் சவிதாதாக்கூர் இதைத் தெரிவித்துள்ளார். போஷண் செயலி மூலம் இந்தியாவில் உள்ள 7.54 கோடி குழந்தைகளின் தரவுகள் பெறப்பட்டு கணிக்கப்பட்டுள்ளது. இதன் மூலம் 0 முதல் 5 வயது குழந்தைகளில் 38.9% குழந்தைகள் வளர்ச்சி குன்றியவர்களாகவும் 17% குழந்தைகள் எடை குறைந்தவர்களாகவும், 5.2% குழந்தைகள் மிகவும் மெலிந்து, எடை குறைந்தவர்களாகவும் உள்ளனர்.

ஆறு வயதுக்குட்பட்ட குழந்தைகளின் புள்ளிவிவரங்களும் பகிரப்பட்டுள்ளன. இதில் 2021-இல் 6 வயதுக்குட்பட்டவர்களாக இருந்த சுமார் 16.1 கோடி குழந்தைகளில் அங்கன்வாடிகளில் சேர்க்கப்பட்ட 8.82 கோடி குழந்தைகளின் விவரங்கள் சேகரிக்க முயற்சிக்கப்பட்டது. இதில் 8.35 கோடி குழந்தைகளின் விவரங்கள் தொகுக்கப்பட்டுள்ளன. இதில் 37% குழந்தைகள் மிகவும் மெலிந்து எடை குறைந்தவர்களாக கணிக்கப்பட்டுள்ளனர். 17% குழந்தைகள் எடை குறைந்தவர்களாகவும் உள்ளனர். இந்த விவரங்களும் மாநிலங்களவையில் தெரிவிக்கப்பட்டுள்ளது.