தொடர் மழை: கடலூரில் இயல்பு வாழ்க்கை பாதிப்பு

ஃபென்ஜால் புயல்காரணமாக, கடலூர் மாவட்டத்தில் சனிக்கிழமை காலை முதல் இடைவிடாமல் தொடர்ந்து பெய்து வரும் பலத்த மழையால் கடலூர், பண்ருட்டி உள்ளிட்ட பகுதிகளில் இயல்பு வாழ்க்கை பாதிக்கப்பட்டது.

கடலூரில் சனிக்கிழமை தொடங்கிய மழை ஞாயிற்றுக்கிழமை வரையில் இடைவிடாமல் கொட்டித் தீர்த்தது. மேலும், பலத்த காற்றும் வீசியது. இதன் காரணமாக சனிக்கிழமை பிற்பகல் முதல் மின் விநியோகம் தடைப்பட்டது.

கடலூரில் சுமார் 2 ஆயிரத்துக்கும் மேற்பட்ட குடியிருப்புகளை மழை வெள்ளம் சூழ்ந்துள்ளது. தாழ்வான பகுதிகளில் இருந்த நூற்றுக்கணக்கான வீடுகளுக்குள் மழை நீர் புகுந்தது. நெல்லிக்குப்பம் சாலை, கடற்கரைச் சாலை உள்ளிட்ட முக்கிய சாலைகளில் சுமார் 2 அடி உயரத்துக்கு மழை நீர், கழிவு நீருடன் கலந்து பெருக்கெடுத்து ஓடியது.

கடும் சீற்றத்துடன் காணப்பட்ட கடல் அலைகள், புயல் கரையைக் கடந்த ஒரு சில மணி நேரத்துக்குப் பின்னர் சற்று குறைந்து காணப்பட்டது. பெரியகங்கணாங்குப்பம், உச்சிமேடு ஆகிய தாழ்வான பகுதிகளில் வசித்த சுமார் 40 பேர் படகுகள் மூலம் மீட்கப்பட்டனர். அவர்கள் தற்போது பாதுகாப்பாக அங்குள்ள தங்கும் விடுதியில் தங்க வைக்கப்பட்டனர்.