புதுச்சேரியில் 1500 ஏக்கர் நெற்பயிர்கள் சேதம்

புதுச்சேரி ஊரகப் பகுதியில் ஃபென்ஜால் புயல், பலத்த மழையால் 17 வீடுகளும், 1,500 ஏக்கர் நெற்பயிர்களும் சேதமடைந்தன.

ஃபென்ஜால் புயல் கரையை கடந்ததையொட்டி, புதுச்சேரி நகர், ஊரகப் பகுதிகளில் பலத்த மழை பெய்தது. விழுப்புரம் மாவட்டத்திலும் பலத்த மழை பெய்த நிலையில், அங்குள்ள வீடுார் அணைதிறக்கப்பட்டதால் சங்கராபரணி ஆற்றில் வெள்ளப்பெருக்கு ஏற்பட்டது. இதனால், கொல்லாங்குப்பம் ஏரி உடைந்து புதுச்சேரியின் கணுவாய்ப்பேட்டை, சந்தைக்குப்பம் பகுதிகளில் விவசாய நிலங்கள், குடியிருப்புகளை வெள்ளம் சூழ்ந்தது. வெள்ளத்தில் சிக்கித் தவித்த 150-க்கும் மேற்பட்டோரை காவல் துறையினரும், வருவாய்த் துறையினரும் மீட்டு, நிவாரண முகாம்களில் தங்க வைத்தனர்.

சங்கராபரணி ஆற்று வெள்ளப்பெருக்கால் கணுவாய்ப்பேட்டை கிராமத்தில் குடியிருப்புகளுக்குள் தண்ணீர் புகுந்தது. இதையடுத்து, பேரிடர் மீட்புக் குழுவினர் விரைந்து வந்து ஏராளமானோரை படகு மூலம் மீட்டனர்.