நீலகிரி, கோவை உள்பட 5 மாவட்டங்களுக்கு இன்று ஆரஞ்ச் எச்சரிக்கை

வடகடலோர மாவட்டங்களில் பல்வேறு பாதிப்புகளை ஏற்படுத்திய ஃபென்ஜால் புயல் கரையைக் கடந்ததை தொடா்ந்து காற்றழுத்த தாழ்வு மண்டலமாக வலுவிழந்து, மேற்கு திசையில் உள்மாவட்டங்களை நோக்கி மெதுவாக நகரும் என்று எதிா்பாா்கப்படுகிறது.

இதனால், கோவை, நீலகிரி உள்பட 5 மாவட்டங்களுக்கு திங்கள்கிழமை (டிச. 2) மிக கனமழைக்கான ‘ஆரஞ்ச்’ எச்சரிக்கை விடுக்கப்பட்டுள்ளது.

வங்கக் கடலில் உருவான ஃபென்ஜால் புயல் புதுச்சேரிக்கு அருகே மரக்காணத்தில் நவ. 30-ஆம் தேதி நள்ளிரவில் கரையைக் கடந்தது. புயல் கரையைக் கடக்கும்போது தமிழகம் மற்றும் புதுச்சேரியில் 3 இடங்களில் அதிகனமழையும் (204 மி.மீ. அதிகம்), 6 இடங்களில் மிக கனமழையும் (120 - 204 மி.மீ.), 20 இடங்களில் கனமழையும் (70 - 110 மி.மீ.) பதிவாகியுள்ளது.

ஞாயிற்றுக்கிழமை காலை நிலவரப்படி அதிகபட்சமாக விழுப்புரம் மாவட்டம் மயிலத்தில் 510 மி.மீ மழை பதிவானது.