5-ஆவது நாளாக முடங்கிய நாடாளுமன்றம்

புது தில்லி, டிச. 2: அதானி விவகாரம் மற்றும் சம்பல் வன்முறை தொடர்பாக விவாதம் கோரி, நாடாளுமன்றத்தின் இரு அவைகளிலும் எதிர்க்கட்சிகள் திங்கள்கிழமையும் அமளியில் ஈடுபட்டன. இதனால், நாடாளுமன்ற இரு அவைகளும் நாள் முழுவதும் ஒத்திவைக்கப்பட்டன.

நாடாளுமன்ற குளிர்கால கூட்டத்தொடர் நவ. 25-ஆம் தேதி தொடங்கியதுமுதல் இந்த விவகாரங்களை எழுப்பி எதிர்க்கட்சி உறுப்பினர்கள் தொடர் அமளியில் ஈடுபட்டு வருகின்றனர். இதனால், இரு அவை அலுவல்களும் ஐந்தாவது நாளாக திங்கள்கிழமையும் முடங்கின.

மக்களவை ஒத்திவைப்பு: மக்களவை காலை 11 மணிக்கு கூடியபோது, அதானி உள்ளிட்ட விவகாரங்கள் மீது விவாதத்துக்கு அனுமதிக்க வலியுறுத்தி அவையின் மையப் பகுதியை முற்றுகையிட்டு எதிர்க்கட்சி உறுப்பினர்கள் முழக்கமிட்டனர்.

அப்போது, 'கேள்வி நேரத்திற்குப் பிறகு இந்த விவகாரங்கள் விவாதத்துக்கு எடுத்துக்கொள்ளப்படும். எனவே, கேள்வி நேரத்தை அனுமதியுங்கள்' என்று அவைத் தலைவர் ஓம் பிர்லா கேட்டுக்கொண்டார். அதைப் பொருட்படுத்தாத எதிர்க்கட்சி உறுப்பினர்கள் தொடர் அமளியில் ஈடுபட்டனர். இதனால், அவையை பகல் 12 மணி வரை ஓம் பிர்லா ஒத்திவைத்தார்.