தீவினைகளைப் போக்கும் மாகறல் கோயில்

ஞ்சிபுரம்- உத்திரமேரூர் சாலையில் சுமார் 15 கி.மீ. தொலைவில் சாலை அருகிலேயே, செய்யாற்றின் வடகரையில் மாகறல் கோயில் இயற்கை எழிலோடு அமைந்துள்ளது.

- கி.ஸ்ரீதரன், தொல்லியல் துறை (பணி நிறைவு).

இங்கு அருள்புரியும் இறைவன் திருமாகறலீசுவரர் என்றும் அம்பாள் திரிபுவன நாயகி என்றும் அழைக்கப்படுகின்றனர். இறைவன் சுயம்புவாக காட்சி தருகிறார்.

மாகறம் என்றால் உடும்பு. லிங்கத் திருமேனி உடும்பு வால் போல் சிறுத்து காணப்படுகிறது. இறைவனை உடும்பீசர், அடைக்கலங்காத்த நாதர், புற்றிடங்கொண்டார், மங்கலங்காத்தவர், அகத்தீசுவரர் என்ற பெயர்களிலும் அழைக்கின்றனர். அக்கினி தீர்த்தம். தல மரமாக எலுமிச்சை விளங்குகிறது. தல விநாயகர் பொய்யா விநாயகர் என அழைக்கப்படுகிறார்.

மாகறன் - மலையன் என்னும் இரு அசுரர்கள் வழிபட்டதோடு, இந்திரன் வழிபட்ட சிறப்புடைய தலமாகவும் விளங்குகிறது. சோழ மன்னனுக்கு இறைவன், பொன் உடும்பாகத் தோன்றினார். அவர் அதை துரத்த, புற்றில் ஓடி ஒளிந்து கொண்டது. பின்னர், ஈசனும் லிங்க வடிவாகத் தோன்றியதாகத் தல வரலாறு கூறுகிறது.

கிழக்கு நோக்கிய கோயில். ஐந்து நிலை இராஜகோபுரம். அடுத்து கொடி மரமும், பலிபீடமும், நந்திமண்டபமும் உள்ளன. பலிபீடத்தின் முன்னர் உள்ள விநாயகர் கொடிமரத்து விநாயகர் என அழைக்கப்படுகிறார்.