தென் கொரிய அதிபருக்கு எதிரான பதவிநீக்க முயற்சி தோல்வி

சியோல், டிச. 7: அவசரநிலை அறிவித்த விவகாரத்தில் தென் கொரிய அதிபர் யூன் சுக் இயோலுக்கு எதிராக நாடாளுமன்றத்தில் எதிர்க்கட்சிகள் கொண்டுவந்த பதவிநீக்கத் தீர்மானம் தோல்வியடைந்தது.

இதற்கான வாக்கெடுப்பை ஆளுங்கட்சி எம்.பி.க்கள் புறக்கணித்ததால் போதிய வாக்குகள் பதிவாகாமல் தீர்மானம் ரத்து செய்யப்பட்டது.

கடந்த 2022-ஆம் ஆண்டு அதிபராகப் பொறுப்பேற்ற யூன் சுக் இயோலுக்கும் நாடாளுமன்றத்தில் பெரும்பான்மை வகிக்கும் எதிர்க்கட்சியான ஜனநாயகக் கட்சிக்கும் இடையே பல்வேறு விவகாரங்களில் கருத்து வேறுபாடுகள் நீடித்து வந்தன.

இந்தச் சூழலில், நாடாளுமன்றத்தை முடக்க எதிர்க்கட்சிகள் முயல்வதாலும், வட கொரியாவுக்கு ஆதரவாக அவர்கள் செயல்படுவதாலும் நாட்டில் அவசரநிலை ராணுவச் சட்டத்தை அமல்படுத்துவதாக யூன் சுக் இயோல் கடந்த செவ்வாய்க்கிழமை அறிவித்து அதிர்ச்சியை ஏற்படுத்தினார்.

எனினும், எதிர்க்கட்சி எம்.பி.க்கள் நாடாளுமன்றத்தில் அந்த அறிவிப்பை ரத்து செய்யும் தீர்மானத்தை நிறைவேற்றினர்.