கட்சிகளிடையே உரசல்: கேள்விக்குள்ளாகும் 'இண்டி' கூட்டணியின் எதிர்காலம்

பாஜகவை ஒருங்கிணைந்து எதிர்க்கும் நோக்கில் எதிர்க்கட்சிகள் உருவாக்கிய 'இண்டி' கூட்டணியில் உரசல் அதிகரித்து வருவதால், அதன் எதிர்காலம் குறித்த கேள்வி எழுந்துள்ளது.

மக்களவைத் தேர்தல் மற்றும் சமீபத்திய பேரவைத் தேர்தல்களில் காங்கிரஸ் அடைந்த தோல்விகளால் அக்கட்சி மீதான கூட்டணி கட்சிகளின் பார்வை மாறியுள்ளது. அதோடு, அதானி மீதான லஞ்சக்குற்றச்சாட்டு உள்ளிட்ட விவகாரங்களில் நாடாளுமன்றத்துக்கு உள்ளேயும் வெளியேயும் இக்கூட்டணி கட்சிகள் இடையே கருத்து வேறுபாடு காணப்படுகிறது.

கடந்த 2023-இல் உருவாக்கம்: 2024 மக்களவைத் தேர்தலில் பாஜகவை ஒருங்கிணைந்து தோற்கடிக்கும் நோக்கில், காங்கிரஸ், திமுக, திரிணமூல் காங்கிரஸ், தேசியவாத காங்கிரஸ் (சரத் பவார்), ஆம் ஆத்மி, ஐக்கிய ஜனதா தளம், ராஷ்ட்ரீய ஜனதா தளம், இடதுசாரிகள் உள்ளிட்ட கட்சிகளால் கடந்த 2023, ஜூன் மாதம் 'இந்திய தேசிய உள்ளடக்கிய வளர்ச்சிக் கூட்டணி' (இண்டியா) என்ற பெயரில் புதிய கூட்டணி உருவாக்கப்பட்டது. அப்போது, 'பாஜகவை ஆட்சியில் இருந்து அகற்றுவோம், நாட்டை பாதுகாப்போம்' என்ற முழக்கத்துடன் எதிர்க்கட்சிகள் கைகோத்தன.