அதானி, சோரஸ் விவகாரங்கள்: நாடாளுமன்ற இரு அவைகளும் ஒத்திவைப்பு

அதானி மீதான லஞ்ச புகார், காங்கிரஸை ஜார்ஜ் சோரஸுடன் தொடர்புபடுத்திய விவகாரங்களை எழுப்பி காங்கிரஸ் உள்ளிட்ட எதிர்க்கட்சிகள் தொடர் அமளியில் ஈடுபட்டதால், நாடாளுமன்ற இரு அவைகளும் திங்கள்கிழமை நாள் முழுவதும் ஒத்திவைக்கப்பட்டன.

நாடாளுமன்ற குளிர்கால கூட்டத்தொடர் கடந்த நவம்பர் 25-ஆம் தேதி தொடங்கியது முதல் அதானி லஞ்ச புகார், சம்பல் வன்முறைச் சம்பவம் உள்ளிட்ட விவகாரங்கள் குறித்து அவையில் அனைத்து அலுவல்களையும் ஒத்திவைத்துவிட்டு விவாதம் நடத்த அனுமதிக்கக் கோரி எதிர்க்கட்சி உறுப்பினர்கள் தொடர் அமளியில் ஈடுபட்டு வருகின்றனர். இதனால், அவை அலுவல்கள் முதல் வாரத்தில் முடங்கின.

இந்நிலையில், மக்களவையில் வியாழக்கிழமை கேள்வி நேரத்தின்போது பேசிய பாஜக எம்.பி. நிஷிகாந்த் துபே, "திட்டமிட்ட குற்றங்கள் மற்றும் ஊழலை வெளிப்படுத்தும் குற்றப்புலனாய்வு ஊடக தளம் (சிசிஆர்பி) வெளியிடும் அறிக்கைகளை சுட்டிக்காட்டி நாடாளுமன்றத்தை முடக்க காங்கிரஸ் தலைமையிலான எதிர்க்கட்சிகள் முயற்சிக்கின்றன. இந்த ஊடக தளத்துக்கும் அமெரிக்க கோடீஸ்வர முதலீட்டாளருக்கும் (ஜார்ஜ் சோரஸ்) தொடர்பு உள்ளது" என்று குற்றஞ்சாட்டினார். இதனால் ஏற்பட்ட அமளியால், மக்களவை அலுவல்கள் வெள்ளிக்கிழமை முடங்கின.

மக்களவை திங்கள்கிழமை காலை 11 மணிக்கு கூடியதும், அதானி லஞ்ச புகார் விவகாரம், காங்கிரஸை ஜார்ஜ் சோரஸுடன் தொடர்புபடுத்திய விவகாரங்களை எழுப்பி காங்கிரஸ் உள்ளிட்ட எதிர்க்கட்சியினர் அவையின் மையப்பகுதிக்குச் சென்று கூடி நின்றபடி அமளியில் ஈடுபட்டனர்.

மேலும், நிஷிகாந்த் துபேக்கு எதிராக மக்களவையில் உரிமை மீறல் நோட்டீஸை காங்கிரஸ் கொண்டுவந்தது. அமளி தொடர்ந்ததால் அவையை பகல் 12 மணி வரை அவைத்தலைவர் ஒத்திவைத்தார். அவை மீண்டும் கூடியபோதும் அமளி நீடித்ததால் அவை பிற்பகல் 2 மணிவரை ஒத்திவைக்கப்பட்டது.