டிச. 27-இல் சென்னை புத்தகக் காட்சி தொடக்கம்

துணை முதல்வர் உதயநிதி ஸ்டாலின் தொடங்கி வைக்கிறார்

சென்னை புத்தகக் காட்சி டிசம்பர் 27-ஆம் தேதி சென்னை, நந்தனம் ஒய்எம்சிஏ மைதானத்தில் தொடங்க உள்ளதாக தென்னிந்திய புத்தக விற்பனையாளர்கள் மற்றும் பதிப்பாளர் சங்கம் (பபாசி) தெரிவித்துள்ளது.

துணை முதல்வர் உதயநிதி ஸ்டாலின், பள்ளிக் கல்வித் துறை அமைச்சர் அன்பில் மகேஸ் பொய்யாமொழி ஆகியோர் புத்தகக் காட்சியைத் தொடங்கி வைக்க உள்ளனர்.

ஜனவரி 12-ஆம் தேதி வரை மொத்தம் 17 நாள்களுக்கு புத்தகக் காட்சி நடைபெறும் என்று பபாசி நிர்வாகிகள் தெரிவித்துள்ளனர்.

இதுதொடர்பாக சென்னையில் திங்கள்கிழமை நடைபெற்ற செய்தியாளர் சந்திப்பில் பபாசி தலைவர் எஸ்.சொக்கலிங்கம், செயலர் எஸ்.கே.முருகன் ஆகியோர் செய்தியாளர்களிடம் கூறியதாவது:

சென்னையில் நடைபெறும் 48-ஆவது புத்தகக் காட்சியில் மொத்தம் 900 அரங்குகள் இடம்பெற உள்ளன. வேலைநாள்களில் பிற்பகல் 2 மணி முதல் இரவு 8.30 மணி வரையிலும், விடுமுறை நாள்களில் காலை 11 மணி முதல் இரவு 8.30 மணி வரையிலும் புத்தகக் காட்சி நடைபெறும்.