செம்பரம்பாக்கம் ஏரி – சாத்தனூர் அணை திறப்பு: முதல்வர் – எதிர்க்கட்சித் தலைவர் கடும் விவாதம்

செம்பரம்பாக்கம் ஏரி - சாத்தனூர் அணை திறப்பு தொடர்பாக முதல்வர் மு.க.ஸ்டாலின், எதிர்க்கட்சித் தலைவர் எடப்பாடி பழனிசாமி ஆகியோரிடையே பேரவையில் செவ்வாய்க்கிழமை கடும் விவாதம் நடைபெற்றது.

சட்டப்பேரவையில் துணை மானியக் கோரிக்கை மீதான விவாதத்தில் அதிமுக உறுப்பினர் தங்கமணி பேசியதாவது:

புயலின்போது, கள்ளக்குறிச்சி, கடலூர், திருவண்ணாமலை, விழுப்புரம், கிருஷ்ணகிரி ஆகிய 5 மாவட்டங்களுக்கு வானிலை ஆய்வு மையம் சிவப்பு எச்சரிக்கை விடுத்தது. அந்தச் செய்தியை மக்களிடம் முறையாகக் கொண்டு சேர்த்திருந்தால், இந்த அளவுக்கு பாதிப்பு ஏற்பட்டிருக்காது. மேலும், சாத்தனூர் ஏரியிலிருந்து 2 லட்சம் கன அடி நீரை முறையாக அறிவித்து திறந்துவிட்டிருந்தால், பெரும் பாதிப்பு ஏற்பட்டிருக்காது. பயிர்கள் பாதிக்கப்பட்டு, விவசாயிகளின் எதிர்காலமே கேள்விக்குறியாகி உள்ளது. அவர்களுக்கு இழப்பீடு வழங்க வேண்டும். திருவண்ணாமலையில் மண்சரிவால் உயிரிழந்தவர்களின் குடும்பத்தினருக்கு தலா ரூ.5 லட்சம் மட்டும் நிவாரணமாக வழங்கியுள்ளீர்கள். கள்ளச்சாராயத்தால் இறந்தால் ரூ.10 லட்சம் தருகிறீர்கள். மண்சரிவால் உயிரிழந்தவர்களின் குடும்பங்களுக்கு கூடுதலாக தலா ரூ.15 லட்சம் தர வேண்டும் என்றார்.

அமைச்சர் விளக்கம்: அப்போது, வருவாய்த் துறை அமைச்சர் சாத்தூர் ராமச்சந்திரன் குறுக்கிட்டு கூறியதாவது:

புயல் வருவதற்கு ஒரு வாரம் முன்பே, அதிகாரிகளை அழைத்து, முதல்வர் தேவையான முன்னெச்சரிக்கை நடவடிக்கைகளை எடுத்தார். சாத்தனூர் அணை திறக்கப்பட்ட போதும்கூட, 5 முறை மக்களுக்கு எச்சரிக்கை கொடுக்கப்பட்ட பிறகுதான் நீர் திறந்துவிடப்பட்டது. அதிமுக ஆட்சியில் மக்களுக்கு எச்சரிக்கை கொடுக்காமல் செம்பரம்பாக்கம் ஏரி திறந்துவிட்டதைப்போல, சாத்தனூர் அணையை திறக்கவில்லை. அவசர கட்டுப்பாட்டு மையத்திலிருந்து லட்சக்கணக்கான மக்களுக்கு எச்சரிக்கை கொடுத்துதான் திறந்தோம்.

அமைச்சர் பொன்முடி: வீடுகளுக்குள்ளே தண்ணீர் புகுந்தாலே நிவாரணம் அளிக்க வேண்டும் என்று முதல்வர் கூறியுள்ளார். கூரை வீடுகள் இடிந்திருந்தால் ரூ.10 ஆயிரம் வழங்கக் கூறியுள்ளார். அனைத்து பயிர்களுக்கும் இழப்பீடு கொடுக்கச் சொல்லியுள்ளார். பயிர் பாதிப்பு குறித்து கணக்கெடுப்பு முடிந்த பிறகு நிவாரணம் வழங்கப்படும்.