திரையரங்கு நெரிசலில் பெண் உயிரிழப்பு; கைதான நடிகர் அல்லு அர்ஜுனுக்கு இடைக்கால ஜாமீன்

தெலங்கானாவில் புஷ்பா-2 சிறப்புக்காட்சியைப் பார்க்க வந்தபோது நெரிசலில் சிக்கி 35 வயது பெண் உயிரிழந்த சம்பவம் தொடர்பான வழக்கில் அத்திரைப்படத்தின் கதாநாயகன் அல்லு அர்ஜுனை மாநில காவல் துறையினர் வெள்ளிக்கிழமை கைது செய்தனர்.

பின்னர், தெலங்கானா உயர்நீதிமன்றத்தில் இடைக்கால ஜாமீன் கிடைத்தும் அவர் வெள்ளிக்கிழமை இரவை சிறையில் கழித்தார்.

நடிகர் அல்லு அர்ஜுன் நடித்த புஷ்பா-2 திரைப்படம் கடந்த 5-ஆம் தேதி வெளியானது. அதற்கு முந்தைய நாள் இரவே ஹைதராபாத்தில் உள்ள திரையரங்கில் இத்திரைப்படத்தின் சிறப்புக் காட்சி வெளியானது. அப்போது, திரைப்படத்தில் நடித்த அல்லு அர்ஜுன் எந்தவித முன்னறிவிப்பும் இன்றி தனியார் பாதுகாவலர்கள் புடைசூழ அந்த திரையரங்குக்கு வந்தனர்.

அவரைப் பார்க்க ரசிகர்கள் முண்டியடித்துக் கொண்டு சென்றனர். அப்போது அல்லு அர்ஜுனுடன் வந்த பாதுகாவலர்கள் ரசிகர்களைப் பிடித்து தள்ளினர். இதனால் அப்பகுதியில் கடுமையான தள்ளுமுள்ளு ஏற்பட்டது. திரையரங்கின் பிரதான இரும்பு கேட் சரிந்து, ஏராளமானோர் கீழே விழுந்தனர். பலர் நெரிசலில் சிக்கினர்.