ஊழல் என்னும் நச்சுமரம்!

ஊழல் இல்லாத இடமே இல்லை. உலகளாவிய ஊழலைக் கண்காணிக்கும் டிரான்ஸ்பெரன்சி இண்டர்நேஷனல் மூலம் ஊழலின் அளவு வெளியிடப்பட்டு வருகிறது.

அதன் 2023 அறிக்கையில் உலகம் முழுவதும் ஊழல் அதிகரித்து வருவதாகவும், ஊழல் நிலையில் மொத்தம் 180 நாடுகளில் இந்தியா 93-ஆம் இடத்தில் இருப்பதாகவும் குறிப்பிடப்பட்டுள்ளது.

ஊழலுக்கு எதிரான ஐக்கிய நாடுகளின் பன்னாட்டு ஒப்பந்தம் கையொப்பமானது. இது சர்வதேச ஒத்துழைப்பு, தகவல் பகிர்வு மற்றும் சொத்து மீட்பு, தண்டனை மற்றும் தடுப்பு நடவடிக்கைகளுக்கான தொழில்நுட்ப உதவி ஆகியவற்றை உறுதி செய்கிறது. இதில் லஞ்சம் வாங்குதல், அதிகாரத்தைத் தவறாகப் பயன்படுத்துதல், மற்றவர்கள் மத்தியில் தேவையற்ற செல்வாக்கை ஏற்படுத்துதல் ஆகியவை அடங்கும்.

அமைதி, நீதி மற்றும் வலுவான நிறுவனங்கள் உலகின் நிலையான வளர்ச்சிக்கு முக்கியமானதாக அங்கீகரிக்கப்பட்டுள்ளன. அனைவரின் நிலையான வளர்ச்சியை உறுதி செய்ய ஊழல் இல்லாத நிறுவனங்கள் அவசியம்.

உலகம் முழுவதும் ஊழலை எதிர்த்துப் போராடுவதற்கான பயனுள்ள உத்திகளை, குறிப்பாக வளர்ந்துவரும் தொழில்நுட்பங்கள் மூலம் பகிர்ந்து கொள்ள ஜி 20 ஊழல் எதிர்ப்புப் பணிக் குழு முடிவு எடுத்துள்ளது. உலகெங்கிலும் உள்ள நாடுகள் எதிர்கொள்ளும் உலகளாவிய சவால், ஊழல் என்பதை அங்கீகரிப்பது அவசியம். மேலும் ஊழலுக்கான தீர்வுகள் ஒவ்வொரு நாட்டின் சூழலுக்கும் ஏற்றதாக இருக்க வேண்டும் என்று அது கூறுகிறது.

உலகம் எங்கும் ஊழல் ஒழிப்பு நாள் ஆண்டுதோறும் டிசம்பர் 9 அன்று அனுசரிக்கப்படுகிறது. ஒரு நாடு எப்போது ஊழலற்ற நாடாக மாறுகிறதோ அப்போதுதான் அந்த நாட்டின் பொருளாதாரமும், மக்களின் வாழ்க்கைத் தரமும் வளர்ச்சியடையும் என்று பொருளாதார வல்லுநர்கள் கூறுகின்றனர். நாட்டில் நடக்கும் ஊழல் மற்றும் லஞ்சத்தை ஒழிக்க வேண்டியது அரசின் முக்கியக் கடமையாகும்.

உலக நாடுகளில் ஊழல் என்பது மிகப் பெரிய பிரச்னையாக வளர்ந்து வருகிறது. இந்தியா மட்டும் விதிவிலக்காக இருக்க முடியுமா? ஊழல் காரணமாக உலகத்தில் மக்களாட்சி மிகப் பெரிய கேள்விக்குறியாக மாறி வருகிறது. அரசு கொண்டுவரும் எல்லாத் திட்டங்களும் விழலுக்கு இறைத்த நீராக மாறி வருகின்றன.

இந்தியா மக்கள் தொகையில் பெரிய நாடாக இருப்பது போலவே, ஊழலிலும் பெரிய நாடாக இருக்கிறது. இது பொருளாதாரத்தைப் பெரிதும் பாதிக்கவே செய்யும்.