ஒருநாள் தொடரை கைப்பற்றியது இந்தியா

ஹர்லீன் தியோல் அசத்தல் சதம்

மேற்கிந்தியத் தீவுகள் மகளிர் அணிக்கு எதிரான 2-ஆவது ஒருநாள் கிரிக்கெட்டில் இந்திய மகளிர் அணி 115 ரன்கள் வித்தியாசத்தில் செவ்வாய்க்கிழமை வெற்றி பெற்றது.

3 ஆட்டங்கள் கொண்ட தொடரில், அடுத்தடுத்து இரு வெற்றிகளுடன் தொடரை கைப்பற்றியது இந்தியா. ஏற்கெனவே டி20 தொடரையும் இந்தியா வென்றது (2-1) குறிப்பிடத்தக்கது.

இந்த ஆட்டத்தில் முதலில் இந்தியா 50 ஓவர்களில் 5 விக்கெட்டுகள் இழப்புக்கு 358 ரன்கள் சேர்க்க, மேற்கிந்தியத் தீவுகள் 46.2 ஓவர்களில் 243 ரன்களுக்கு 10 விக்கெட்டுகளையும் பறிகொடுத்தது. ஒருநாள் கிரிக்கெட்டில் தனது முதல் சதத்தை பதிவு செய்த இந்தியாவின் ஹர்லீன் தியோல் ஆட்டநாயகி ஆனார்.