அமெரிக்க முன்னாள் அதிபர் ஜிம்மி கார்ட்டர் (100) காலமானார்

அமெரிக்க வரலாற்றில் மிக அதிக காலம் வாழ்ந்த முன்னாள் அதிபர் என்ற பெருமையைப் பெற்றுள்ள ஜிம்மி கார்ட்டர், தனது நூறாவது வயதில் காலமானார்.

நாட்டின் 39-ஆவது அதிபரான அவர், கடந்த 1977-ஆம் ஆண்டு முதல் 1981-ஆம் ஆண்டு வரை அந்தப் பொறுப்பை வகித்தார்.

ஜார்ஜியா மாகாணத்தில் உள்ள அவரின் சொந்த ஊரான ப்ளெயின்ஸில் வயது மூப்பு காரணமாக ஏற்பட்ட உடல் நலக் குறைவால் தனது இல்லத்தில் அவர் மரணமடைந்ததாக அவரது குடும்பத்தினர் தெரிவித்தனர்.

இது குறித்து அதிபர் ஜோ பைடன் வெளியிட்டுள்ள அறிக்கையில், 'முன்னாள் அதிபர் ஜிம்மி கார்ட்டரை இழந்துள்ளதன் மூலம் அமெரிக்காவும் உலகமும் மிகச் சிறந்த தலைவர், அரசியல் மாமேதை, மனிதாபிமானியை இழந்துள்ளன' என்று குறிப்பிட்டுள்ளார்.

அடுத்த அதிபராகத் தேர்ந்தெடுக்கப்பட்டுள்ள டொனால்ட் டிரம்ப் வெளியிட்டுள்ள அறிக்கையில், 'ஜிம்மி கார்ட்டரின் அரசியல் கொள்கைகளை நான் உறுதியாக எதிர்த்து வந்தாலும், தேசத்தின் மீதான அவரின் அதீத நேசத்தை மிகவும் மதிக்கிறேன். அமெரிக்காவை மேலும் சிறந்த நாடாக்குவதற்கு அவர் பாடுபட்டார்' என்று தெரிவித்துள்ளார்.

ஜனநாயகக் கட்சியைச் சேர்ந்த ஜிம்மி கார்ட்டர், இந்தியாவுக்கு ஆதரவான நிலைப்பாட்டைக்கொண்டவராக அறியப்படுகிறார். இந்தியாவில் அவசரநிலை நீக்கப்பட்டு, அடுத்து நடைபெற்ற தேர்தலில் ஜனதா கட்சி வெற்றி பெற்று ஆட்சிமைத்த பிறகு 1978-ஆம் ஆண்டில் அவர் இந்தியா வந்தார்.