தமிழக செஸ் வீரர் குகேஷுக்கு 'கேல் ரத்னா' விருது

தமிழகத்தைச் சேர்ந்த செஸ் வீரர் டி.குகேஷுக்கு, இந்திய விளையாட்டுத் துறையில் உயரிய 'தியான்சந்த் கேல் ரத்னா விருது' அறிவித்து மத்திய அரசு கௌரவித்துள்ளது.

மேலும், தமிழக பாரா பாட்மின்டன் வீராங்கனைகள் துளசிமதி முருகேசன், நித்யஸ்ரீ சுமதி சிவன், மனிஷா ராமதாஸ் ஆகியோருக்கு 'அர்ஜுனா விருது' அறிவிக்கப்பட்டுள்ளது.

விளையாட்டுத் துறையில் இந்தியாவை உலக அளவில் பெருமைப்படுத்தியவர்கள், துறை சார்ந்து சிறப்பாகச் செயல்படுபவர்கள், களுக்கு ஆண்டுதோறும் மத்திய இளைஞர் நலன் மற்றும் விளையாட்டு அமைச்சகம் சார்பில் விருதுகள் வழங்கப்படுகின்றன.

அந்த வகையில், கடந்த ஆண்டுக்கான (2024) விருது வென்றவர்கள் பட்டியலை அமைச்சகம் வியாழக்கிழமை வெளியிட்டது.