சரியான திசையில் பயணம்!

சென்னைப் பல்கலைக்கழக ஆய்வு ஒன்று குற்றவாளிகள் தண்டனையைப் பெறுவது எந்த வகையிலும் அவர்களைத் தவறு செய்வதிலிருந்து தடுப்பதில்லை என்று கூறுகிறது.

- முனைவர் என். பத்ரி

இதே பல்கலைக்கழகத்தின் மூலம் நடத்தப்பட்ட மற்றொரு ஆய்வு, தற்சமயம் தொடர் குற்றவாளிகளாக இருப்பவர்கள், சிறார்களாக அல்லது இளைஞர்களாக இருக்கும்போது குற்றங்களைச் செய்யத் தொடங்கினர் என்றும், பின்னர் குற்றங்களைத் தொடர்ந்து செய்து வந்திருக்கிறார்கள் என்றும் கண்டறிந்துள்ளது.

முதல்முறையாக சிறைக்குச் சென்று வரும்போது இருக்கும் மனவருத்தம், அவர்களுக்கு அடிக்கடி சிறை செல்லும்போது இருப்பதில்லை. ஆதரவற்ற பலர் சிறையைப் பாதுகாப்பான ஓர் இடமாகவே கருதுகிறார்கள்.

பொய் சொல்வதைத் தொடக்கமாகக் கொள்ளும் இளம் குற்றவாளிகள், முறையாகக் கண்காணிக்கப்படாதபோது தடம் மாறுகிறார்கள். இந்நிலையில்தான், அவர்கள் மனம் போன போக்கில் வாழ முனைகிறார்கள். கவலையை மறக்க போதைப்பொருள்களைப் பயன்படுத்தும் இவர்கள், போதையின் பாதையில் செல்லும் போது, என்ன செய்கிறார்கள் என்று அவர்களுக்கே தெரிவதில்லை. அதனால் திருட்டு, வழிப்பறிக் கொள்ளை, வாகனக் கொள்ளை, ஏடிஎம் கொள்ளை, முதியோர்களைக் குறி வைத்து பொருளாதாரக் குற்றங்களில் ஈடுபடுவது, கைப்பேசி திருட்டு போன்ற தனக்குச் சாத்தியமான அத்தனை குற்றங்களிலும் இவர்கள் ஈடுபடுகிறார்கள். இது வளமான சமுதாயத்திற்கு உரம் ஊட்டுவதாக அமையாது.