பேரவைக்கு நெருக்கடி: ஆளுநருக்கு பேரவைத் தலைவர் கண்டனம்

சட்டப்பேரவைக்கு ஆளுநர் நெருக்கடி கொடுத்ததாகக் கூறி, அவருக்கு பேரவைத் தலைவர் அப்பாவு கண்டனம் தெரிவித்தார்.

சென்னை, ஜன. 8:

சட்டப்பேரவையில் புதன்கிழமை பேரவைத் தலைவர் அப்பாவு கூறியதாவது: சட்டப்பேரவைக்கு ஜன. 6-இல் ஆளுநர் வந்து சென்ற பிறகு, 'எக்ஸ்' தளத்தில் நாடாளுமன்றத்தில் பின்பற்றப்படுகிற நடைமுறையைக் குறிப்பிட்டு, ஒரு கருத்தை வெளியிட்டு, பின்னர் அதை நீக்கியுள்ளார். பின்னர், அனைத்து சட்டப்பேரவைகளிலும் பின்பற்றப்படும் நடைமுறை என சிலவற்றைக் குறிப்பிட்டு, அதையும் நீக்கி வேறு ஒரு கருத்தைத் தெரிவித்துள்ளார். பாஜக சட்டப்பேரவை உறுப்பினர் வானதி சீனிவாசனின் கருத்தை, அப்படியே தன்னுடைய கருத்தாகவும் வெளியிட்டுள்ளார். அவர்களுடைய கருத்திலேயே தடுமாற்றம் இருந்துள்ளது. அதையும் நீக்கிவிடுவார்கள் என்று அனைவரும் பேசிக் கொள்கின்றனர்.

நேரலை பிரசார் பாரதி குழப்பம்: இந்த விவகாரம் தொடர்பாக சில விளக்கங்களை அளிக்க விரும்புகிறேன். தூர்தர்ஷன் என முன்பு இருந்தது தற்போது பிரசார் பாரதி என மாற்றப்பட்டுள்ளது. 1999-ஆம் ஆண்டுமுதல், அரசமைப்புச் சட்டத்தின்கீழ், ஆளுநர் சட்டப்பேரவையில் உரையாற்றிய நிகழ்வுகளை நேரடியாக ஒளிபரப்பு செய்து வருகிறது.

பொதுவாக, சென்னை தொலைக்காட்சி நிறுவனத்திடமிருந்து முறையான அனுமதி கோரும் விண்ணப்பம் வரும், அதை பேரவைத் தலைவர் பரிசீலித்து ஒவ்வோராண்டும் சில நிபந்தனைகளுக்குட்பட்டு அனுமதி வழங்குவார். அந்த நிபந்தனைகளில் ஒன்று, ஆளுநர் உரையை மட்டுமே ஒளிபரப்பு செய்தல் வேண்டும் என்பதாகும்.

நான் பேரவைத் தலைவராகப் பொறுப்பேற்ற பின்னர், பிரசார் பாரதி நிறுவனத்துக்கு ஏற்கெனவே பல ஆண்டுகளாக கூறப்பட்ட நிபந்தனைகளுக்குட்பட்டு நேரடி ஒளிபரப்பு செய்ய அனுமதி வழங்க நடவடிக்கை எடுக்கப்பட்டது.

2022 ஜனவரி 5 முதல் 2022 மே 10 வரை நடைபெற்ற பேரவை நடவடிக்கைகளில் வினாக்கள் -விடைகள், கவன ஈர்ப்பு, விதி 110-இன்கீழ் அறிக்கைகள், முக்கிய சட்டமுன்வடிவுகளின் மீதான விவாதம், தனித் தீர்மானங்கள் மற்றும் அமைச்சர்களின் பதிலுரைகள் ஆகியவை நேரடி ஒளிபரப்பு செய்யப்பட்டன. இதற்காக ரூ.44.65 லட்சம் பிரசார் பாரதி நிறுவனத்துக்கு பேரவைச் செயலகத்தால் வழங்கப்பட்டது.