தொழில் முதலீடுகளை ஈர்ப்பதற்காக அதிகாரிகளுக்கு ரூ.2,200 கோடி லஞ்சம் கொடுத்ததாகப் புகார்!!

பிரபல தொழிலதிபரும் இந்தியாவின் 2ஆவது பெரிய செல்வந்தருமான கவுதம் அதானி, அமெரிக்காவில் இருந்து தொழில் முதலீடுகளை ஈர்க்கவும், இந்தியாவில் ரூ.17 ஆயிரம் கோடி மதிப்பிலான சூரிய ஒளி மின் திட்ட ஒப்பந்தங்களைப் பெறவும் இந்திய அதிகாரிகளுக்கு ரூ.2,200 கோடி லஞ்சம் கொடுத்ததாக புகார் எழுந்துள்ளது.

இது தொடர்பாக அமெரிக்காவின் நியூயார்க் நீதிமன்றத்தில் தொடரப்பட்ட வழக்கில் தொழிலதிபர் அதானி மற்றும் அவரது உறவினர் சாகர் அதானி உள்பட 7 பேருக்கு பிடிவாரண்ட் பிறப்பித்து அமெரிக்க நீதிமன்றம் உத்தரவு பிறப்பித்துள்ளது.

அகமதாபாத்தைத் தலைமையிடமாகக்கொண்ட இந்தியாவில் மட்டுமின்றி உலகின் பல நாடுகளில் வர்த்தகம் செய்யும் அதானி குழுமம் கடந்த சில ஆண்டுகளில் அசுர வளர்ச்சி அடைந்தது.

வைர வியாபாரியாக கத்தை தொடங்கிய அதானி, அதன் பிறகு நிலக்கரி, எரிவாயு, மின்சாரம், விமான நிலையம், துறைமுகம், தொலைதொடர்பு என பல்வேறு துறைகளில் தொடர்ந்து ஆதிக்கம் செலுத்தி வருகிறார்.

ஆகுறுகிய கால இடைவெளியில் உலக பணக்காரர்களுக்கே சவால் விடும் அளவுக்கு அவரது வளர்ச்சி அபரிமிதமான அளவில் இருந்தது.

கடந்த ஆண்டு ஆகஸ்டு மாதம் 143.2 பில்லியன் டாலர் சொத்து மதிப்புடன் உலகப் பணக்காரர்கள் வரிசையில் பில்கேட்ஸை பின்னுக்குத் தள்ளி 3வது இடத்தை பிடித்து பலரையும் வியப்படையச் செய்தார்.

அதே சமயம், குறுகிய கால இடைவெளியில் அதானி நிறுவனங்கள் பங்குச் சந்தையில் அசாத்திய உயரத்தை எட்டியது எப்படி என்ற கேள்வியும் இருந்து வந்தது.

இதனிடையே, அமெரிக்காவைச் சேர்ந்த முதலீட்டு ஆய்வு நிறுவனமான ஹிண்டன்பெர்க் "பங்குச்சந்தை மோசடிகள் மற்றும் கணக்கியல் முறைகேடுகள்" தலைப்பில் ஆய்வறிக்கை ஒன்றை வெளியிட்டு அதானி குழுமத்தின் மீது கடுமையான மோசடிப் புகார்களை முன்வைத்தது.

அதில், அதானி குழும நிறுவனங்களின் பங்குப் பற்றிய மதிப்பு கடந்த 3 ஆண்டுகளில் மிகப்பெரிய வளர்ச்சியை அடைந்ததில் முறைகேடு நடந்திருக்கிறது.

குறிப்பாக அதானி நிறுவனம் போலி நிறுவனங்களைத் தொடங்கி வரி ஏய்ப்பிலும், பண மோசடியிலும் ஈடுபட்டுள்ளனர் என்று கூறியிருந்தது. இதன் எதிரொலியாக அதானி குழுமத்தின் பங்குகள் மளமளவென சரியத் தொடங்கியது.