கடலுக்குள்ளேயே நீடிப்பதால் மழை தாமதம்: புயல் சின்னம் மிகவும் மெதுவாகவே நகர்கிறது!

மாமல்லபுரம் - காரைக்கால் இடையே 30-ஆம் தேதி கரையைக் கடக்கும்!!

வங்கக்கடலில் உருவாகியுள்ள புயல் சின்னம் மணிக்கு 2 கி.மீ. வேகத்தில் மிகவும் மெதுவாகவே நகர்ந்து கொண்டிருக்கிறது. இதனால் கரையை கடப்பதில் தாமதம் ஏற்பட்டுள்ளது. நவம்பர் 30-ஆம் தேதி மாமல்லபுரம்-காரைக்கால் இடையே கரையைக் கடக்கும் என எதிர்பார்க்கப்படுகிறது. அதனால் கனமழை தொடங்குவதிலும் தாமதம் ஏற்பட்டுள்ளது.

வங்கக்கடலின் தென்கிழக்குப் பகுதியில், அந்தமான் தீவுகளுக்குத் தெற்கே கடந்த சனிக்கிழமை குறைந்த காற்றழுத்த தாழ்வு நிலை உருவானது. இது படிப்படியாக வலுப்பெற்று முதலில் குறைந்த காற்றழுத்த தாழ்வு மண்டலமாகவும், பின்னர் ஆழ்ந்த மண்டலமாகவும் மாறியது. இந்தப் புயல் சின்னம் முதலில் மேற்கு-வடமேற்கு திசையில் நகர்ந்தது. இதனால் இலங்கையின் கிழக்குக் கடற்கரையை நெருங்கியது. இதன்காரணமாக இலங்கையில் கனமழை கொட்டியது.

இந்தப் புயல் சின்னம் ஆழ்ந்த மண்டலமாக மாறிய பின்னர் மேற்கு-வடமேற்கு திசையில் நகரத் தொடங்கியது. இதன் விளைவாக மேகக்கூட்டங்கள் தமிழக கடற்கரைப் பகுதிக்கும் விரிவடைந்தது. அதனால் தமிழகம் முழுவதும் கடந்த 3 தினங்களாக வெயில் முகாம்கிடையாது. மேகத்தால்கூரை அமைக்கப்பட்டதுபோல் உள்ளது. தென் மாவட்டங்களில் லேசான தூரல் மட்டுமே பெய்தது.